BYA KUTENDEKA MWISAMBO
LUFUNJISHO 5
Ambainga na Mushingi
Jifunde: “Byambo byenu kimye kyonse bikale na bibusa kabiji byalungwamo mukele.”—Kolo. 4:6.
Byaubile Paulo
1. Tambai VIDYO, nangwa tangai Byubilo 17:22, 23. Apa binomwisambe ano mepuzho:
-
Paulo waumvwine byepi ku muchima byo amwene bintu byatama byaubilenga bupopweshi bwa bubela mu Atene?—Monai Byubilo 17:16.
-
Kwa kubula kuzhachisha bena Atene pa bintu byatama byo baubilenga, Paulo na mushingi waubile byepi kwingijisha bintu byo baitabijilemo pa kuba’mba ebasapwile mambo awama?
Ñanyi Bintu byo Twafunjilako kwi Paulo?
2. Bantu kibapeelela bingi kuteleka ku mambo awama o tusapwila inge ke tusale bulongo byambo bya kwamba, mwa kwambila ne kimye kya kwibyambilamo.
Ubainga Byaubanga Paulo
3. Salainga bulongo byambo bya kwamba. Inge tubena kwisamba na muntu wabula kwitabila mu Baibolo, mwafwainwa kupimpulako jishinda ja kwisambilamo pa byaamba Baibolo nangwa pe Yesu.
4. Kange mupelawizhenga kololako muntu waamba byapusana na Baibolo ne. Mulekai akasuluke kwamba byonse biji ku muchima wanji. Inge waamba bintu byapusana na byaamba Baibolo, kange mutendeke kwipachika nanji ne. (Yako. 1:19) Inge mwateleka ku byo abena kwamba, kukemukwasha kuyuka bintu byo aitabilamo ne ene mambo o ebitabila.—Maana 20:5.
5. Monai bintu bimo byo aamba bisakwimulengela kuyila mumo nangwa byo mwafwainwa kumusanchilapo. Kampe wakonsha kushiinwa mwine amba bintu byo aitabilamo bya kine. Inge waamba bino, esekai kusalapo mutwe wa kwisambapo usakwimulengela kuyila mumo. Kuba bino kukemulengela kumukwasha kumvwisha byaamba Baibolo.
