MPILA YA YANTIKILA E MOKO
LONGI DIA 5
Songanga Luzitu
Nkanikinu: “Yambula mvovo mieno miakalanga miangemba ntangwa zawonso.”—Kol. 4:6.
Adieyi Paulu Kavanga?
1. Tala e VIDEO yovo tanga Mavangu 17:22, 23. I bosi, vana e mvutu za yuvu ilende:
-
Aweyi Paulu kamona mu kuma kia mavangu ma nsambil’a luvunu mavangamanga kuna Atenai?—Tala Mav. 17:16.
-
Vana fulu kia tumba esi Atenai, aweyi Paulu kasadila mana bakwikilanga muna kubasila umbangi?
Adieyi Tulongokele Muna Mbandu a Paulu?
2. Diasazu dikala kwa muntu muna kutuwá avo tutomene sola mana tuvova, una tuvovela mo ye ntangwa tuvova mo.
Tanginina Paulu
3. Toma solanga e mvovo. Muna bonga e nona, vava omokenanga yo muntu ke kwikilanga mu Yesu ko, nanga divava vo watoma sola e mvovo muna kunzayisa oma ma Bibila yovo ma Yesu.
4. Kukadi ye nzaki za singika muntu ko. Yambula kasonga e ngindu zandi. Avo ovovele diambu ke dina ngwizani ko ye malongi ma Bibila, kutantani ko ngatu kumfungila makasi. (Yak. 1:19) Avo otomene sia e sungididi, ozaya mana kekwikilanga ye ekuma kekwikidilanga mo.—Nga. 20:5.
5. Tambulwilanga yo sanisina muntu. Nanga okwikilanga vo mana melongwanga muna dibundu diandi maludi. Ozevo, yika diambu dina yeno awole nukwikilanga, i bosi, malembe-malembe unsadisa kabakula dina e Bibila kilonganga.
