KATAMALI JOSʼIN CHJA̱KAONAJMÍ CHJOTA
KJOAʼMIYA 5
Takolai kjoaxkóntokon
Texto: “Ñaki nda tinókjoao kao kjoanda” (Col. 4:6).
Jokisʼin Pablo
1. Chótsenlai VIDEO, kʼoa tsa maije̱ tʼexkiai Hechos 17:22, 23. Xijekoa̱n, chótʼayajin kjoachjonangi jebi:
-
Kʼianga kicho Pablo ya naxinandá Atenas, jókisʼe kon nga tsabe nga nʼio nkjín xkóson tjín (tʼexkiai Hechos 17:16).
-
ʼNdele nga kʼoakuitsole nga tsín nda tjíosʼín, jósʼin kisichjén je costumbre xi tjínle chjota xi Atenas tsʼe nga kitsoyale Énle Niná.
Jméni xi bakóyaná jokisʼin Pablo
2. Ngisaa nda kjuinrʼoéná chjota kʼiatsa nda chósonnilee jotso én xi si̱chjén, josʼin chja̱koaa kʼoa kʼiani chja̱koaa.
Chjénngi choa̱le Pablo
3. Nda chósonnilai jotso én xi si̱chjain. Tobʼelañá, kʼiatsa je chja̱koai jngo chjota xi tsín makjainle xi tʼatsʼe Jesús, tsakui nichxin kjaʼaísʼin kʼoétsʼiakoai nga chja̱kaoni xi tʼatsʼe Biblia kʼoa tsa tʼatsʼe Jesús.
4. Ali tokjoan nikixiyandajin tsa tsín kʼoatjín jokuitso. Tʼaiʼndelai nga kʼoakatatso josʼin síkjaʼaitsjen. Kʼoa tsa tsín kʼoatjín jmeni xi kuitso, alijojin ʼmilai (Sant. 1:19). Kʼiatsa nda kuinóʼyalai jchaní josʼin makjainle kʼoa ánni kʼoasʼin makjainnile (Prov. 20:5).
5. Kʼoatʼinlai nga kʼoatjín jmeni xi títso kʼianga tjen ndiaale. Kuenta tʼiain nga kʼoasʼin síkjaʼaitsjen je chjota nga ñaki kʼoatjín josʼin makjainle. Kui cho̱bayaño xi mangóson josʼin nikjaʼaitsjaon kʼoa xijekoa̱n, bijbi tisenkoai nga katamajinle jotso je Biblia.
