IVYAKUTALIKA UKULANZYANYA NA WANTU
ISAMBILILO 5
Muwacenjela pa Kulanda
Icisinka cisundo: ‘Muleke imilandile yinu yiwawa amizima.’—Kolo. 4:6.
Vino Paulo Wacisile
1. Tambani e VIDYO, nanti wazyani Imilimo 17:22, 23. Apano mwasuke amawuzyo yano yakonkapo:
-
Uzye e Paulo wivwile wuli pano waweni imipepele ya wufi mu Ateni?—Lolani Imilimo 17:16.
-
Uzye e Paulo wawomvizye wuli umucenjelo pa kuwizizya awina Ateni?
Avyani Vino Tukusambililako kwe Paulo?
2. Awantu wakayikundila ukuteyelezya kwe vyo tukulanda nga cakuti tukusola icete amazwi ya kulanda, vino twandi tuyalande ni mpindi ya kuyalandilapo.
Mwakolanya Paulo
3. Mwasola icete amazwi ya kulanda. Ku cakulolelako pano mukulanda na wino atamanya imipepele ya wina Klistu, muzipizile ukupiluka pano mukulanda pe Baibolo na pe Yesu.
4. Mutasamalila ukulunjika umuntu. Mwaleka alanda vino wamanya. Nga walanda vino vipusine na vino Baibolo yikasambilizya, mutapanzinkana. (Jemu. 1:19) Nga mukuteyelezya pano akulanda, mulimanya vino wazumilamo nu mulandu wuno wavizumilila.—Imilu. 20:5.
5. Mwazumilizyako nu ku musalifya pano cayana. Amuno ncepamwi umweneco angalanga wasuwila ukuti vino wazumilamo avya cisinka. Mwatalicila ukulanzyanya pe vino mwensi mwazumilizyanya, apano mukupita kwa mpindi mumwavwe ukumanya vino Baibolo yikasambilizya.
