KIXÁ’A NATÚ’UN XÍ’IN NA̱ YIVÍ
LECCIÓN 5
Vií ka̱ʼún xíʼinna
Ña̱ káʼa̱n tu̱ʼun Ndióxi̱: “Nda̱a̱ táki̱ʼva ndúya̱si̱n iin ña̱ʼa ña̱ xíxina tá kíta ñi̱i̱ xíʼinña saá xíniñúʼu koo tu̱ʼun ña̱ ka̱ʼa̱nndó” (Col. 4:6).
Ña̱ ke̱ʼé ta̱ Pablo
1. Koto VIDEO á kaʼvi Hechos 17:22, 23. Tándi̱ʼi, ndakanixi̱ní xa̱ʼa̱ pregunta ña̱ va̱xi yóʼo:
-
¿Ndáaña ndo̱ʼo ta̱ Pablo tá xi̱nira ña̱ ku̱a̱ʼání ndióxi̱ vatá íyo ñuu Atenas? (Koto Hechos 17:16).
-
¿Ndáa ki̱ʼva ni̱ka̱ʼa̱n ta̱ Pablo xíʼin na̱ ñuu Atenas tá na̱túʼunra xíʼinna xa̱ʼa̱ Ndióxi̱?
¿Ndáaña sákuaʼayó xíʼin ña̱ ke̱ʼé ta̱ Pablo?
2. Va̱ʼaníka kuniso̱ʼona tá viíní ndáka̱xinyó ña̱ ka̱ʼa̱nyó xíʼinna, ta saátu ndáa ki̱ʼva ka̱ʼa̱nyó xíʼinna ta ama ka̱ʼa̱nyó xíʼinna.
Keʼé táki̱ʼva ke̱ʼé ta̱ Pablo
3. Viíní ndaka̱xiún ña̱ ka̱ʼún xíʼinna. Tá kúú, sava na̱ yiví kǒo xáʼa̱nvína ni iin veʼe-ñu̱ʼu, ña̱kán xíniñúʼu ndukún ndáa ki̱ʼva kixáʼún ka̱ʼún xíʼinna xa̱ʼa̱ ta̱ Jesús á xa̱ʼa̱ Biblia.
4. Kǒo ka̱ʼún xíʼinna ña̱ va̱ása va̱ʼa íyo ña̱ ni̱ka̱ʼa̱nna. Taxi ná ka̱ʼa̱nna ña̱ ndákanixi̱nína. Tá ña̱ káʼa̱nna va̱ása kítáʼanña xíʼin ña̱ va̱xi nu̱ú Biblia, kǒo ka̱ʼún xíʼinna ña̱ va̱ása va̱ʼa ña̱ ni̱ka̱ʼa̱nna (Sant. 1:19). Tá viíní xíniso̱ʼún ña̱ káʼa̱nna xíʼún saá va̱ʼaní xa̱ún kunda̱a̱-iniún ndáaña kándíxana ta nda̱chun kándíxanaña (Prov. 20:5).
5. Tá vií nda̱kuiina iin pregunta, ka̱ʼa̱n xíʼinna ña̱ va̱ʼaní íyo ña̱ ni̱ka̱ʼa̱nna. Ndakaʼán chi na̱ yiví ndákanixi̱nína ña̱ va̱ʼaníva íyo ña̱ kándíxana. Ña̱kán, ka̱ʼa̱n xíʼinna xa̱ʼa̱ iin ña̱ʼa ña̱ inkáchi kándíxa u̱vi̱ saándó, ta loʼo tá loʼo chindeétáʼan xíʼinna ña̱ kunda̱a̱-inina ña̱ káʼa̱n Biblia.
SAÁTU KOTO
Prov. 25:15; 2 Tim. 2:23-26; 1 Ped. 3:15
