GO THOMA POLEDIŠANO
THUTO 5
Eba le Temogo
Molao wa motheo: “Anke mantšu a lena ka mehla e be a kgahlišago.”—Bakol. 4:6.
Seo Paulo a se Dirilego
1. Bogela BIDIO goba o bale Ditiro 17:22, 23, ke moka o leke go hwetša dikarabo tša dipotšišo tše di latelago:
-
Paulo o ile a ikwa bjang ge a be a bona Baathene ba rapela medimo ya maaka?—Bona Ditiro 17:16.
-
Go e na le gore Paulo a ahlole Baathene, o ile a bontšha bjang gore o hlompha bodumedi bja bona gore a kgone go ba botša ditaba tše dibotse?
Seo re Ithutago Sona go Paulo
2. Gantši ge re kgetha mantšu ge re bolela le batho e bile re tseba gore re bolela le bona neng le gona bjang, go ba bonolo gore ba re theetše.
Ekiša Paulo
3. Kgetha mantšu gabotse ge o bolela le batho. Ka mohlala, ge o bolela le motho yo a gotšego e se Mokriste, leka go kwešiša maemo a gagwe gomme o se ke wa bolela le yena ka tsela yeo o tlwaetšego go bolela ka yona ge o bolela le batho bao ba tlwaelanego le Beibele.
4. O se ke wa kitimela go phošolla motho yoo o bolelago le yena. Mo tlogele a bolele ka bolokologi. Ge a bolela dilo tšeo di sa dumelelanego le seo Beibele e se rutago, o se ke wa ngangišana le yena. (Jak. 1:19) Mo theetše, e le gore o kgone go tseba seo a se naganago.—Die. 20:5.
5. Ge e ba go kgonega, dumelelana le yena gomme o mo rete. A ka ba a kgodišegile gore bodumedi bja gagwe ke bja nnete. Leka go boledišana le yena ka selo seo le dumelelanago ka sona, ke moka o mo thuše ganyenyane-ganyenyane go kwešiša seo Beibele e se rutago.
