OKUTANDIKA EKIGAANIIRO
EISHOMO 5
Okwegyendesereza
Omusingye: “Ebigambo byanyu bigume biri eby’embabazi.”—Kol. 4:6.
Eki Paulo Yaakozire
1. Reeba VIDIYO, nari shoma Ebyakozirwe 17:22, 23. Bwanyima oyetegyereze ebibuuzo ebirikukurataho:
-
Paulo akeehurira ata ahabw’ebikorwa by’ediini y’ebishuba ebi yaareebire omuri Aseene?—Reeba Ebyakozirwe 17:16.
-
Paulo omu mwanya gw’okucwera Abaseene orubanja, akooreka ata okwegyendesereza arikwihirira aha nyikiriza zaabo kubabuurira amakuru marungi?
Nitwegyera ki Ahari Paulo?
2. Abantu nibabaasa kutuhurikiza twayegyendesereza ebi turikugamba, oku turikugamba, n’obu turikugamba.
Tooreza Paulo
3. Toorana gye ebigambo byawe. Nk’eky’okureeberaho, waaba noogamba n’omuntu otarikumanya eby’Ekikristaayo, noobaasa kuhindura oku orikwanjura Baibuli, nari oku orikugamba ahari Yesu.
4. Otarahuka kuhabura omuntu. Murekye agambe oku arikwehurira. Yaagamba ekitarikuhikaana n’enyegyesa za Baibuli, yetantare kuhakana nawe. (Yak. 1:19) Waamuhurikiza, noija kwetegyereza gye emiteekateekyere ye.—Enf. 20:5.
5. Ikirizana nawe, kandi omusiime kyaba nikibaasika. Naabaasa kuba naateekateeka ngu enyikiriza z’ediini ye zihikire. Tandika orikugamba aha bi murikwikirizanaho, reero mporampora ogume noomuhwera kwetegyereza eki Baibuli erikwegyesa.
