RA TUẸN IKUEGBE RHỌ
UYONO 5
Ha Ona Ruiruo
Uruemru-urhi: “Jenẹ ẹmro are o rhirhiẹ ye dẹndẹn ọke ephian.”—Col. 4:6.
Oborẹ i Paul o Ruru
1. Ni IVIDIO na, yanghene se Acts 17:22, 23. Orho ru, gbe roro kpahen enọ enana:
-
Marhẹ oma o ruẹ Paul kpahen irueruo ẹga efian rọ mẹrẹnren uvuẹn Athens?—Se Acts 17:16.
-
Ukperẹ i Paul ọnọ ghwai brorhiẹn kpe itu Athens, marhẹ o ru nyoma oborẹ aye i vwo imwẹro kpahen ghwoghwo iyẹnrẹn esiri na rẹn aye?
Me ya na Sabu Yono Mie i Paul?
2. Arha dabu jomarhotọre sanọ oborẹ ana ta, ọke ra na ta ye, ọrhẹ oborẹ ana ta ye lele, ọyẹ ihworho ina mai kerhọ ọwan.
Hẹrokele i Paul
3. Jomarhotọre sanọ oborẹ wu na ta. Jerẹ udje, wa rha tẹmro rẹn ohworho ro vwo rhe kpahen i Baibol na, gba damoma ha ona ruiruo orhianẹ wa guọlọ se ekete i Baibol yanghene hunute i Jesu.
4. Wu vwe brokpakpa kpọ ohworho vi-i. Ha uphẹn riẹn nọ ta oborẹ ọ ha ẹhẹn yen. Ọrhọ ta oborẹ ọ hasuẹ iyono i Baibol na, wu vwe lelie frẹfro-o. (Jas. 1:19) Wu rha dabu kerhọ ye, ọnọ ha userhumu wẹn rhe oborẹ o vwo imwẹro kpahen, ọrhẹ oborẹ ọsoriẹ o vwo imwẹro kpahiẹn.—Prov. 20:5.
5. Orho serhọ, kwerhọ oborẹ ọ tare jeghwai kpẹmiẹ. Ọnọ sabu vwo imwẹro taghene uyono rẹ ẹga ye ọ haphia i gbare. Guọlọ oborẹ owẹwẹ ọrhẹ ọye i vwo imwẹro kpahen, orho ru, gba ha userhumu riẹn vwẹruọ iyono i Baibol na bibiesuọn.
