FU̱DI GI ÑÄUI YÄ JÄꞌI
RÄ LECCIÓN 5
Ñä ko rä tꞌekꞌei
Näꞌä udi rä Mäkä Tꞌofo: «Ñähu̱ ko ndunthi rä tꞌekꞌei ꞌne rä mhäte» (Col. 4:6).
Näꞌä bi me̱fi rä apostol Pablo
1. Hyandi rä BIDEO o hñeti Hechos 17:22, 23. ꞌNepu̱ thädi nuya yä ntꞌani:
-
¿Te bi senti rä apostol Pablo ora bi hyandi ge nuꞌu̱ yä mengu Atenas mi xo̱kämbeni yä idolo? (Hyandi Hechos 17:16).
-
¿Hanja bi ꞌñudi rä tꞌekꞌei rä apostol Pablo ora bi predikabi nuꞌu̱ yä mengu Atenas?
¿Te utkägihu̱ rä ejemplo rä apostol Pablo?
2. Mu̱ gä zofohu̱ yä jäꞌi ko rä tꞌekꞌei ꞌne gä huahnihu̱ xä ñho nuꞌu̱ yä noya gä usahu̱, nuꞌu̱ mänꞌa ma dä ne dä mplatika kongekhu̱.
De̱mbäbi rä ejemplo rä apostol Pablo
3. Huahni xä ñho nuꞌu̱ ri noya. Mu̱ näꞌä rä jäꞌi hinte ne dä bädi de yä relijion, po rä mhäte mbeni xä ñho te ma gi xipäbi ꞌne huahni xä ñho nuꞌu̱ yä noya ma gi usa pa gi predikabi.
4. Hyopi dä ñä. Hyopi näꞌä zi jäꞌi dä mää te mbeni ꞌne te senti. Jamäsu näꞌä dä xiꞌi, ꞌne ogi korreji mäske näꞌä mää hingä geꞌä udi rä Mäkä Tꞌofo (Sant. 1:19). Mu̱ gi yꞌo̱de näꞌä dä xiꞌäꞌi, ma dä maxꞌäꞌi pa gi ntiende te mbeni ꞌne te kamfri (Prov. 20:5).
5. Hyoni nꞌa rä raso pa gi felisita näꞌä jäꞌi. Beni ge rꞌabu̱ yä jäꞌi huyämu̱i ge rä relijion geꞌä udi näꞌä mäjuäni. Po rängeꞌä, dä hogi ge mꞌe̱tꞌo gi hyoni ngu de te dä za gi ñähu̱ ꞌne ko rä pasensia gi fatsꞌi rꞌamätsꞌu̱ dä ntiende te udi rä Mäkä Tꞌofo de näꞌä temaꞌä.
