KUMSA KOMBERSA
LISON 5
Mostra rispitu
Prinsipiu di Biblia: “Bo kombersa dibi di sabi”. — Kol 4:6.
Ke ku Paulu fasi
1. Jubi VIDEO, o lei Atus 17:22, 23. Dipus pensa diritu nes purguntas:
-
Kuma ku Paulu sinti kontra ki oja riliẑion falsu na pratikadu na Atenas? — Jubi Atus 17:16.
-
En ves di kondena jintis di Atenas, kuma ku Paulu usa ke ke fia nel pa konta elis bon noba ku rispitu?
Ke ku no aprindi di Paulu?
2. Jintis mas na misti sukutanu, si no kuji diritu ke ku no na fala, kuma ku no na falal i kal ora ku no na falal.
Kopia isemplu di Paulu
3. Pensa diritu na palabras ku bu na usa. Pur isemplu, ora ku bu na papia ku un algin ki ka kriston, talves bu na pirsisa di muda bu manera di kumsa kombersa aserka di Biblia o kuma ku bu na papia di Jesus.
4. Ka bu ten dipresa pa kuriẑi algin. Disal pa i papia avontadi. Si fala un kusa ku ka sta di akordu ku ke ku Biblia ta nsina, ka bu tenta diskuti ku el. (Tiagu 1:19) Si bu sukutal diritu, bu na sibi ke ki fia nel, i pabia ki fia nel. — Dit 20:5.
5. Ora ki pusivel, mostral di kuma bu konkorda ku el i ngabal. Talves i fia di kuma kusas ku si riliẑion ta nsina i bardadi. Purmeru, papia di kusas ku abos dus bo sta di akordu ku el, i puku-puku judal ntindi ke ku Biblia ta nsina.
