KYƐBƆ ƐNE EBIE KƆHYƐ YEBO KƆBƆ NGƆMMƆ Ɔ
ADESŨA 5
Fa Wɔnye To Ase
Bɔ Adesũa Ne Gyi So Ɔ: “Ɛmɔma ɛmɔ noa dwudwolɛ yɛ fɛ.”—Kol. 4:6.
Bɔ Pɔɔlo Yɛle Ɔ
1. Nea VIDIO ne, anaa kenga Asomafoɛ 17:22, 23. Eyie a susu nzɛmmisa hemɔ nwo:
-
Mmerɛ bɔ Pɔɔlo nwuni kyɛ Atensefoɛ nemɔ sõ bosõen ne, sɛɛ yeɛ ɔtele nga ɔ?—Nea Asomafoɛ 17:16.
-
Atẽe beni yeɛ Pɔɔlo fale so ne bɛ bɔle ngɔmmɔ bɔ wandwudwo wandia bɛ ɔ?
Bɔ Pɔɔlo Yɛle Ne, Nzu Yeɛ Yesũa Yefi Nu Ɔ?
2. Sɛ yɛne ebie bɔ ngɔmmɔ a, nna edwirɛ biala bɔ ɔkɔwa yɛ tianu nu ne, yeɛ odikyɛ yɛkã ɔ. Na mmom odikyɛ yesusu edwirɛ nanwo yé, ná yenwu kyɛbɔ yɛkɔhã ye ɔ. Sɛ yɛyɛ sɔ a, ɔmaa mmenia taa tie edwirɛ bɔ yɛkã ne.
Suesũa Bɔ Pɔɔlo Yɛle Ne
3. Susu edwirɛ bɔ ɛkɔhã nanwo yé. Sɛ ɛne ebie bɔ ɔngɔ asɔre bɔ ngɔmmɔ, na sɛ ɛpena kyɛ ɛkenga tworɔnzɛm bie, anaa ɛkã Yesu nwo dwirɛ kyire ye a, nnɛyɛ ye kyɛbɔ yɛyɛ ye daa ne, na mmom sɛ ɔkɔyɛ yé a sesã nu.
4. Sɛ sona ne dwudwo a, yɛ dinn tie ye. Ɛyɛ a, ma sona ne atẽe má odwudwo. Sɛ ɔkã edwirɛ bie bɔ ɔne Bible ne nyia po a, nnɛsu ye aporowaa. (Yak. 1:19) Sɛ ɛyɛ dinn tie ye a, ɔkɔmaa ekonwu adwene bɔ sona ne le ye ɔ.—Any. 20:5.
5. Pena edwirɛ bie bɔ ɛmɔ adwene yia wɔ yenwo ɔ. Ebia sona ne kɔhã kyɛ, bɔ bekyirekyire ye wɔ ye sõen nu ne, yeɛ ɔte nahorɛ ɔ. Sɛ ɔba sɔ a, pena edwirɛ bie bɔ ɛne y’adwene yia wɔ yenwo, na ɛmɔbɔ yenwo ngɔmmɔ. Nzieɛn, na ato wɔ boase aboka ye maa wate nahorɛ bɔ ɔwɔ Bible nanu nabo.
