KU SUNGULA BULO
DYONDZO 5
Vana Ni Vuxiyaxiya
Nsinya wa nawu: “Marito ya n’wina a ma ve ni nsovo nkarhi hinkwawo.”—Kol. 4:6.
Leswi Pawulo A Swi Endleke
1. Hlalelani VHIDIYO, kumbe mi hlaya Mitirho 17:22, 23. Kutani mi hlamula swivutiso leswi landzelaka:
-
Pawulo a a titwisa ku yini hi mihivahivana ya vukhongeri bya mavunwa leyi a yi voneke eAtena?—Vona Mitirho 17:16.
-
Ku ri ni ku sola vanhu va le Atena, hi xichavo Pawulo u ti tirhise njhani tidyondzo leti a va pfumela eka tona leswaku a chumayela mahungu lamanene?
Hi Dyondza Yini Eka Pawulo?
2. Vanhu va nga hi yingisa loko hi vukheta hi hlawula leswi hi swi vulaka, ndlela leyi hi swi vulaka hayona ni nkarhi lowu hi swi vulaka ha wona.
Tekelela Pawulo
3. Hlawula marito hi vukheta. Hi xikombiso, loko u vulavula ni munhu loyi a nga riki Mukreste, u nga ha boheka ku antswisa ndlela leyi u sungulaka bulo ra le Bibeleni hayona kumbe loko u vulavula hi Yesu.
4. U nga hatliseli ku lulamisa munhu. N’wi tshike a tiphofula hi ku tshunxeka. Loko a vula mhaka leyi nga fambisaniki ni tidyondzo ta le Bibeleni, u nga phikizani na yena. (Yak. 1:19) Loko u n’wi yingisela, u ta tiva leswi a pfumelaka eka swona ni xivangelo lexi endlaka a pfumela eka swona.—Swiv. 20:5.
5. Pfumelelana na yena u tlhela u n’wi bumabumela loko swi koteka. A nga va a tiyiseka hi ku helela leswaku tidyondzo ta vukhongeri byakwe i ntiyiso. Ringetani ku vulavula hi mhaka leyi mi pfumelelanaka eka yona kutani hakatsongotsongo u n’wi pfuna ku twisisa leswi Bibele yi swi dyondzisaka.
