OPATXERIHA OTTHEKULA
YOOSOMA 5
Ovara murima
Miruku sa mBiblyani: ‘Etempu yootheene nuulumo nanyu nikhaleke nooreera.’ — Akol. 4:6.
Etthu Paulo aapankaawe
1. Moone EVIIDIYU, naari musome Miteko 17:22, 23. Avinyaka mwaakhule makoho enttharelana:
-
Paulo oonenle moota heeni oonakaru soopaka sa ittiini sa ethiru wAtena? — Munwehe Miteko 17:16.
-
Paulo aavanre moota heeni murima atthu aaleelaawe mitthenka sooreera?
Ntakihero na Paulo ninnixuttiha eheeni?
2. Onnooneya weera atthu eneereke oniiwa ele nnuulumaahu wakhala weera noothanla mooreerela ele ninkelaahu wuuluma, moota ninkelaahu wuuluma ni emaara heeni ninkelaahu wuuluma.
Mutthareke ntakihero na Paulo
3. Muthanleke nnene masu munrowaanyu wuuluma. Mwa ntakihero, mwaatthekulaka ni mutthu ettiini awe ehikhanle yeekristu, apaale waamukhala wooreera otxentxa moota munuulumaanyu woohima sa Biblya ni moota mummuromolaanyu Yesu.
4. Moonelela weera mutthu ootthekiha, muhimuleeleke moowaakuveya. Mmuhiyeke toko mutthu owo uulumeke mootaphuwa. Wakhala weera mutthu owo onimuuluma etthu ehinvarihana ni ele Biblya onxuttihaawe, mpixeke murima weera muhikhaleno munepa woonyakulihana. (Yak. 1:19) Vaavo nyuwo mummwiiwelelaanyu mutthu moomaaleleya, nyuwo munnawera wiiwexexa nnene sene ele mutthu owo onuupuwelaawe woohima sa mwaha owo nyuwo munuulumaanyu. — Mir. 20:5.
5. Waawereyaka vale, mwaakhuleleke ni mutthu owo ni mmuttottopeleke wa etthu ohimmaawe. Apaale mutthu owo onnaroromela ni murima awe wootheene weera sookhovelela sa ettiini awe ti sa ekhaikhai. Wakhala weera oohima eyo, mweerereke toko wuuluma etthu nyuwo munroromelaanyu. Avinyaka vakhaani-vakhaani mmukhavihereke mutthu owo wiiwexexa ele Biblya onxuttihaawe.
