HAASAYISSIYOGAA DOOMMIYOGAA
TIMIRTTE 5
Hiillanchcha Gidiyogaa
Geeshsha Maxaafaa Maaraa: “Intte haasayai ubba wode, siyanau . . . ufaissiyaagaa gidanau bessees.”—Qol. 4:6.
Phawuloosi Oottidobaa
1. BIIDUWA beˈa, woy Oosuwaa 17:22, 23 nabbaba. Yaatada, kaallidi deˈiya oyshata akeeka:
-
Phawuloosi Ateena kataman deˈiya eeqaa goynuwa beˈido wode awu aybi siyettidee?—Oosuwaa 17:16 xeella.
-
Phawuloosi Ateena asata boriyogaappe, etawu mishiraachchuwa yootanawu eti ammaniyobaa hiillan waati goˈettidee?
Phawuloosappe Ay Tamaariyoo?
2. Nuuni asawu yootanabaa, qassi yootiyo ogiyanne wodiya akeekan dooriyaba gidikko, eti nu yootiyobaa siyana danddayoosona.
Phawuloosa Milata
3. Haasayanabaa akeekan doora. Leemisuwawu, neeni Kiristtaane gidenna uraa haasayissiyo wode, Geeshsha Maxaafaa erissiyo woy Yesuusabaa yootiyo ogiya laammiyogee koshshana danddayees.
4. Ne haasayissiyo uri balidoogaa yootanawu eesotoppa. I ba qofaa loytti qonccissanaadan ootta. Geeshsha Maxaafay tamaarissiyobaara maayettennabaa I yootikko, aara palamettoppa. (Yaaq. 1:19) I yootiyobaa siyiyogan, I ammaniyobay aybakko, qassi I hegaadan ammaniyoy aybissakko erana danddayaasa.—Lee. 20:5.
5. Danddayettida keenan he uraara maayetta, qassi A galata. I ba haymaanootee tamaarissiyobay tuma giidi mintti ammanana danddayees. Intte naaˈˈaykka maayettana danddayiyobaa koyro yoota, yaata simmada, Geeshsha Maxaafay tamaarissiyobaa I akeekanaadan loddan loddan maadda.
