PAGTIKANG HA PAKIISTORYA
LEKSYON 5
Pagin Mataktika
Prinsipyo: “An iyo mga pulong magin makaruruyag pirme.”—Col. 4:6.
An Ginbuhat ni Pablo
1. Kitaa an VIDEO, o basaha an Buhat 17:22, 23. Katapos, batona an masunod nga mga pakiana:
-
Ano an gin-abat ni Pablo ha mga buruhaton han buwa nga relihiyon nga iya nakita ha Atenas?—Kitaa an Buhat 17:16.
-
Imbes sawayon an mga taga-Atenas, paonan-o mataktika nga ginamit ni Pablo an ira mga gintotoohan basi maisangyaw ha ira an maopay nga sumat?
Ano an Aton Mahibabaroan kan Pablo?
2. Mas mamamati ha aton an mga tawo kon pipilion naton hin maopay an aton isisiring ngan kon paonan-o ngan san-o ito iyayakan.
Subara hi Pablo
3. Pilia hin maopay an imo mga pulong. Pananglitan, kon nakikiistorya ha usa nga diri nag-aangkon nga Kristiano, bangin kinahanglan mo i-adjust an paagi han imo pagpakilala han Biblia o kan Jesus.
4. Likayi nga tadungon dayon an imo kaistorya. Tuguti hiya nga iyakan an iya opinyon. Kon may maiyakan hiya nga diri uyon ha katutdoan ha Biblia, ayaw pakigdebate. (San. 1:19) Pinaagi ha pagpamati, mahibabaroan mo kon ano an iya gintotoohan ngan kon kay ano nga natoo hiya hito.—Prob. 20:5.
5. Uyuni ngan kumendasyuni an imo kaistorya kon posible. Bangin para ha iya tama gud an iya mga gintotoohan. Puydi mo anay hisgotan an topiko nga iyo ginkakauyonan, ngan hinay-hinay hiya nga buligi nga masabtan kon ano an igintututdo han Biblia.
