BYA KUTENDEKA MWISAMBO
LUFUNJISHO 6
Kuchinchika
Jifunde: “Twachinchikile na mambo a Lesa kuba’mba twimubuule mambo awama.”—1 Tesa. 2:2.
Byaubile Yesu
1. Tambai VIDYO, nangwa tangai Luka 19:1-7. Apa bino mwisambe ano mepuzho:
Ñanyi Bintu byo Twafunjilako kwi Yesu?
2. Twafwainwa kuchinchika pa kusapwila mambo awama ku bantu bonse.
Ubainga Byaubanga Yesu
3. Ketekelai mwi Yehoba. Mupashi wa Lesa wapeele Yesu bulume bwa kusapwila. Ko kuba’mba ne anweba wafwainwa kwimukwasha. (Mat. 10:19, 20; Luka 4:18) Lombainga kwi Yehoba kwimupa bulume bwa kuchinchika pa kuba’mba musapwile bantu bo muchina.—Byu. 4:29.
4. Kange muzhachishenga bantu ne. Kimye kimo kyakonsha kwitukatazha kwisamba na bantu bamo na mambo a byo bamweka, baya nkuwa, banonshi, byo boba nangwa bintu byo baitabilamo. Bino yukai bino bishinka:
-
Yehoba ne Yesu bayuka biji mu michima ya bantu. Pakuba atweba kechi tuji na bulume bwa kuyuka bilanguluka bantu ne.
-
Kange tulangulukenga’mba awe muntu kuba bamukwasha kwi Yehoba ne.
5. Jimukai ne kuchinchika. (Mat. 10:16) Kange mwipachikenga na bantu ne. Inge muntu wakana kuteleka ku mambo awama nangwa mwamona’mba bumi bwenu buji mu kizumba, chibikizhai mwisambo mu mushingi.—Maana 17:14.
