PAGTIKANG HA PAKIISTORYA
LEKSYON 6
Kaisog
Prinsipyo: “Nagkaada kami hin kaisog pinaagi han aton Dios nga isumat ha iyo an maopay nga sumat.”—1 Tes. 2:2.
An Ginbuhat ni Jesus
1. Kitaa an VIDEO, o basaha an Lucas 19:1-7. Katapos, batona an masunod nga mga pakiana:
-
Kay ano nga bangin ginlilikyan han iba nga tawo hi Zakeo?
-
Ano an nagpagios kan Jesus nga isangyaw la gihapon ha iya an maopay nga sumat?
Ano an Aton Mahibabaroan kan Jesus?
2. Kinahanglan naton hin kaisog basi maisangyaw ha ngatanan an mensahe han Ginhadian.
Subara hi Jesus
3. Sarig kan Jehova. Pinaagi han espiritu ni Jehova, ginbuligan niya hi Jesus nga magsangyaw nga may kaisog. Mabubuligan ka liwat niya. (Mat. 10:19, 20; Luc. 4:18) Pangaro kan Jehova hin kaisog basi makagsangyaw ha imo mga nahahadlokan.—Buh. 4:29.
4. Ayaw dayon hukmi an mga tawo. Bangin mag-alang kita ha pakiistorya ha pipira nga tawo tungod han ira hitsura, estado ha kinabuhi, paagi han pagkinabuhi, o mga gintotoohan. Pero hinumdumi:
-
Hi Jehova ngan hi Jesus nakakabasa han kasingkasing; kita diri.
-
Kaya buligan ni Jehova an bisan hin-o.
5. Magin maisugon kondi matinalahuron ngan maikmat. (Mat. 10:16) Likayi an pakigdebate. Matinalahuron nga taposa an pakiistorya kon an indibiduwal nadiri pamati ha maopay nga sumat o kon inaabat mo nga diri ka talwas.—Prob. 17:14.
