UKUQALA INGXOXO
ISIFUNDO 6
Ungesabi
Isimiso: “Saqunga isibindi ngoNkulunkulu wethu ukuze sinitshele izindaba ezinhle.”—1 Thes. 2:2.
Lokho UJesu Akwenza
1. Bukela IVIDIYO, noma ufunde uLuka 19:1-7. Ngemva kwalokho, phendula le mibuzo elandelayo:
Sifundani KuJesu?
2. Kudingeka singesabi ukuze sikwazi ukushumayela umyalezo woMbuso singakhethi.
Lingisa UJesu
3. Thembela kuJehova. Umoya kaNkulunkulu wanikeza uJesu amandla okushumayela, lowo moya ungakunikeza nawe amandla. (Math. 10:19, 20; Luka 4:18) Cela uJehova akusize ungesabi ukushumayeza abantu abakwethusayo.—IzE. 4:29.
4. Ungasheshi wahlulele abantu. Singase sigweme ukukhuluma nabantu abathile ngenxa yendlela ababukeka ngayo, indlela ababhekwa ngayo emphakathini, isimo sabo sezimali, indlela abaphila ngayo noma izinkolelo zabo. Kodwa khumbula:
-
NguJehova noJesu abakwazi ukufunda okusezinhliziyweni; thina asikwazi.
-
Akekho umuntu okufanele sicabange ukuthi isihe sikaJehova asimfanele.
5. Ungesabi, kodwa ngesikhathi esifanayo qapha futhi ungabacasuli abantu. (Math. 10:16) Gwema ukuphikisana nomuntu oxoxa naye. Ngenhlonipho, yinqamule ingxoxo uma umuntu engazilaleli izindaba ezinhle noma uma uzizwa ungaphephile.—IzAga 17:14.