REVISITANAK LURAM
8 YATICHÄWI
Paciencianïñasawa
Bibliajj akham siwa: “Munasir jaqejj paciencianiwa” (1 Cor. 13:4).
Kunsa Jesusajj luräna
1. VIDEO uñtäta, jan ukajj Juan 7:3-5 ukat 1 Corintios 15:3, 4, 7 liytʼäta. Ukatsti, aka jisktʼanakaruw qhanañchtʼäta:
¿Kunsa Jesusat yateqassna?
2. Yaqhepanakajj mayninakat sipansa janiw jankʼak Bibliarjam cambionak lurapkiti, ukhamajj paciencianïñasawa.
Jesusat yateqasim
3. Yaqha toqetwa yantʼañamaraki. Utanitï Bibliat yatichayasiñ jan munkchi ukhajja, janiw obligañamäkiti. Ukampis wakisini ukhajj kunjamsa Bibliat yatichasi, kunjamsa Bibliat yatjjatañajj yanaptʼaspa uka toqet parlir videonakwa uñachtʼayasma, jan ukajj uka toqet parlir yatichäwinakwa liytʼarapisma.
4. Janiw khitimpis igualayañamäkiti. Sapa mayniw mayj mayjätanjja. Mä familiarasatï jan ukajj mä revisitatï Bibliat yatichayasiñ qalltañ ajjsarayaschi jan ukajj Biblian mä yatichäwipat payachaschi ukhajja, ¿kunatsa ukham amuyi? sasin jisktʼasim. ¿Kunar creyiñas jupatakejj wali importante? ¿Familiaranakapa jan ukajj vecinonakapati Bibliat yateqañap jan munapki? Kuna toqettï parlapkta uk amuytʼañapatak tiemp churam, ukhamat kuntï Bibliajj yatichki ukar valoranit uñjañapataki.
5. Jehová Diosat mayirapim. Jehová Diosaruw jan qarjtañataki, suma arunakamp parlañatak yanaptʼa mayiñama. Bibliat yateqañatak jan chʼamachasipki ukanakarojja, kunapachas jaytjjañajj wakisjjaspa uk amuytʼañatakis Diosar mayisiñamarakiwa (1 Cor. 9:26).
