NIAN SRAN OSU
LIKE SUANLƐ 8
Tra ɔ awlɛn
Ndɛ cinnjin’n: “Sran ng’ɔ klo sran’n, ɔ trɛ i awlɛn.”—1 Kor. 13:4.
Like nga Zezi yoli’n
1. Nian VIDEO’N, annzɛ kanngan Zan 7:3-5 nin 1 Korɛntifuɛ Mun 15:3, 4, 7 be nun. I sin’n, bu kosan nga’m be akunndan:
?Ngue yɛ like nga Zezi yoli’n kle e-ɔ?
2. Jasin fɛ bolɛ nun’n ɔ fata kɛ e tra e awlɛn. Afin kɛ ɔ ko yo naan sran wie’m b’a sɔ jasin fɛ’n nun’n ɔ fa blɛ.
Sɔnnzɔn Zezi
3. Kacikaci wafa nga a bo jasin fɛ’n. Sɛ i bo bolɛ nun’n sran kun kunndɛman kɛ ɔ́ súan Biblu’n nun like’n nán fa tintin i wun. Sɛ a ɲɛn i wun atin’n, fa video annzɛ ndɛ wie mun fa ukɛ i naan ɔ wun wafa nga e kle sran’m be Biblu’n nun like’n nin i su ye ng’ɔ kwla ɲɛn i’n be wlɛ.
4. Nán fa sran kun sunnzun sran uflɛ. Sran’m be ti fanunfanun. Sɛ e osufuɛ kun annzɛ sran kun mɔ e ko niɛn i osu’n kunndɛman kɛ ɔ́ súan Biblu’n nun like’n, maan e kunndɛ like nga ti yɛ ɔ yo sɔ’n. ?Ɔ o Ɲanmiɛn sulɛ wafa wie nun? ?I osufuɛ annzɛ i wiengu’m be kle i yalɛ? Mɛn i blɛ naan ɔ bu ndɛ nga a kannin’n nin wafa nga Biblu’n kwla ukɛ i’n be akunndan.
5. Srɛ sran sɔ’m be ti Ɲanmiɛn. Srɛ Zoova naan ɔ uka ɔ naan ɔ sa sin w’a bubuman ɔ, naan kusu w’a kwla kan ndɛ’n w’a kle sran’n kɛ ng’ɔ nin i fata’n sa titi. Sɛ ndɛ’n loman sran’n i kpa’n naan ɔ fata kɛ a yaci i osu nianlɛ’n, srɛ Zoova naan ɔ man ɔ ngwlɛlɛ naan a wun i wlɛ.—1 Kor. 9:26.