Tü sukuwaʼipakat nutuma Jesús

Tü watüjakat nünainjee Jesús

2. Nnojoliinjana kashapajaaralin waya, jama eejeenain na wayuu nnojoliikana aapaamaatüin sümaa tü pütchi anakat maʼin.

 Waaʼinra tü naaʼinrakat Jesús

3. Piiʼirata sukuwaʼipa pikirajia. Nnojo püpüleeruain saaʼin wanee wayuu nnojorüle shikirajaamaatüin sünain tü Bibliakat. Anasü pünajirüle shia video jee shiale pütchi akaalinjeetka shia süpüla shiyaawatüin saaʼu jamüin anaka maʼin ekirajawaa sünain tü Bibliakat otta jamüin aneetka sukuwaʼipa saaʼinrüle tia.

4. Nnojo puʼwanaajireʼerüin sukuwaʼipa wayuu. Nnojotsü wanaawain sukuwaʼipa wayuu. Jamüshijaʼa eetaale wanee püpüshi jee niale wanee wayuu puuyantakai amaʼanamüin, nnojoikai ekirajaweein sünain tü Bibliakat jee nnojoikai aapaweein sümaa tü sümakat tü Bibliakat, anasü jülüjale paaʼin jamüin makaʼa nukuwaʼipa. Anashi püsakireʼerüle paaʼin sünain tüü: «¿Kojutusüche maʼin nümüin tü nunoujakalü anain? ¿Apüleeruaana aaʼinchiche nia natuma na nüpüshikana jee shiale natuma na wayuu kepiakana nüʼütpünaa?». Nnojo püpüleeruain naaʼin, puuʼulaa nüsakireʼerai naaʼin sünain tü pümakat jee kojutaiwa nümüin tü sümakat tü Bibliakat.

5. Puʼuraaja nümüin Maleiwa nüpüleerua wanee wayuu ekirajaweekai pümaa. Puchunta kaalinwaa nümüin Jehová süpüla nnojoluinjatüin süshapajaain paaʼin otta piyaawatajatüin saaʼu pukuwaʼipa. Puchunta kaalinwaa nümüin Jehová süpüla piyaawatajatüin saaʼu puuʼulaainjachire suulia oʼunaa nümaʼanamüin wanee wayuu nnojoikai kasajachin amüin tü sümakat tü Bibliakat (1 Cor. 9:26).