ŌCIGBIHI NYƆ
ƐLĀ Ō NWU ƆMƐ 8
Bēē Gbeyicii
Ukɔ́: “Ɔ́dāŋ ka ɔ̄cɛ he uwɔ ɔtū ayíka a lɔtūlé lɛ ɔ́.”—1 Ukɔ́r. 13:4.
Ɔdā Nɛ Ujisɔsi Ya
1. Lɛ UVIDIO nyā mafu, amāŋ jé Ujɔ́ni 7:3-5 mla 1 Ācɛ Ukɔ́rīnti 15:3, 4, 7. Cɛɛ a leyi yɛ aɔka nōo ba nyā:
Ɔdi Nɛ Alɔ Nwu Ŋma Ɛgiyi Ujisɔsi A?
2. Alɔ cɛgbá ō gbeyicii ohigbu ka ó gē je eko lɛ ācɛ ōhi fiyɛ ācɛ ɔhá gbɔbu ɛɛ kéē miyɛ ɔkoolɔhi a cɛ.
Gbla Ujisɔsi Ya
3. Jé ɔwɛ ɔhá má. Ɔdaŋ ka ɔcɛ a i cɛ ō gbɔɔ oklɔcɛ ku Ubáyíbu boobu ŋ, a hii kwu ɔ ba ɔ abɔfu ŋ. Eko okpaakpa bi auvidio amāŋ aikpɛyi ɛlā ɛyɛɛyɛyi le ta ɔ abɔ, kóō jé ɔdā nōo gē ya eko nɛ alɔ gē klɔcɛ ku Ubáyíbu mla itene nɛ ó géē lɛ ŋma anu a.
4. A hii lɛ ɔ gbla ɔcɛ ɔhá ŋ. Ɔnyɔɔnyɛ wɛ ɛyɛɛyɛyi. Ɔdaŋ ku ɔcɛ apɔlɛ ku alɔ amāŋ ɔcɛ nɛ alɔ gē cigbihi nyɔ i má a yɔ i piya ɔkwu ajɛ ō gbɔɔ oklɔcɛ ku Ubáyíbu amāŋ miyɛ ɛlā ō nwu ku Ubáyíbu cɛ, leyi yɛ ɔdā nōo ya ɛɛ nɛ ó yɔ i ya lɛ a. Ó lɛ ɔdā nɛ ó kpɔtuce ɔ ŋma ɔwɛ ō gba ɛ̄gbā ku nu nōo cɛgbá lɛ ɔ nɛɛnɛhi nɛɛ? Aɔmaapu ku nu amāŋ ācɛ nōó gē piyatɔha mla uwa a gē kwu ɔ ba ɔ kóō ya odee nɛɛ? Le eko taajɛ lɛ ɔ kóō gbɛla lɛyikwu ɔdā nɛ a ka a, ku aɛlā ku Ubáyíbu kóō klla je ɔ eyī.
5. Gbɔɔkɔ lɛyikwu ɔcɛ nɛ ɛlā a he ɔtu a. Da Ujehofa ka ó ta uwɔ abɔ ku ɛ̄jɛ̄ ku eyiyoce kóō hii jɛ uwɔ ŋ ku a klla ya odee mla ijeeyi. Da Ujehofa ka ó ta uwɔ abɔ ku a jé eko nɛ ɛlā a i he ɔcɛ a ɔtu ŋ ɔkwɔɔkwɛyi, o ya ɛɛ ku a lɛ abɔ ci ōcigbihi nyɔ ɛgiyi nu.—1 Ukɔ́r. 9:26.