OZIHEBRO
UWUHRẸ AVỌ 8
Wo Odiri
Oware nọ Ebaibol ọ ta: “Uyoyou u re wo odiri.”—1 Kọr. 13:4.
Oware nọ Jesu O Ru
1. Rri IVIDIO na, hayo se Jọn 7:3-5 gbe 1 Ahwo Kọrint 15:3, 4, 7. Kẹsena whọ vẹ kẹ iyo enọ nọ e rrọ obotọ na:
Eme Ma Wuhrẹ Mi Jesu?
2. O gwọlọ nọ ma re wo odiri keme u re lehie taure ahwo jọ a tẹ te rọwo oware nọ Ebaibol na ọ ta.
Rọ Aro Kele Jesu
3. Dawo edhere ọfa. Nọ ohwo ọ gbẹ rọwo nọ who wuhrẹ iẹe Ebaibol evaọ okioke yena ha, whọ gbae họ họ. Nọ u te kiehọ, dhesẹ ividio kẹe hayo izoẹme jọ nọ e sai fiobọhọ kẹe riẹ oghẹrẹ nọ ma re ro wuhrẹ ahwo Ebaibol, gbe erere nọ o ti tei.
4. Whọ rọ ohwo jọ wawo omọfa ha. Ahwo kpobi a rrọ oghẹrẹ ọvo ho. Otẹrọnọ omoni ra jọ hayo omọfa nọ whọ be hai zihe bru ọ be rọwo wuhrẹ Ebaibol ho, hayo ọ be rọwo oware jọ nọ Ebaibol na o wuhrẹ hẹ, roro kpahe oware nọ o sae jọ nọ o be whae ze. Kọ oware jọ nọ ọ rọwo evaọ egagọ riẹ o be whae ze? Kọ imoni riẹ hayo amọfa a be wọso ẹe hayo sei ẹkoko? Whọ kpakpa iẹe oma ha, kẹe oke nọ o re ro roro kpahe ẹme nọ whọ ta kẹe re ọ sae ruẹ epanọ Ebaibol na ọ sai ro fiobọhọ kẹe.
5. Hae lẹ roro ohwo na. Lẹ se Jihova re ọ kẹ owhẹ areghẹ nọ whọ gbẹ rọ rehọ onaa fiobọhọ kẹ ohwo na, je rẹro nọ ohwo na ọ te rọwo wuhrẹ ẹdẹ jọ. Jẹ lẹ sei re o fiobọhọ kẹ owhẹ riẹ okenọ u fo nọ whọ rẹ rọ kpairoro vrẹ ohwo na.—1 Kọr. 9:26.
