WEN WI GO BAK GO TAAK TU DEM
LESN 8
Tek Taim Wid Dem
Sitn We Yu Kyan Riizn Pan: ‘Wen sumadi av lov iina dem aat, dem tek taim wid piipl.’—1 Kor. 13:4.
Wa Jiizas Did Du
1. Wach di VIDIYO, ar riid Jan 7:3-5 an 1 Korintiyan 15:3, 4, 7. Den ansa dem kwestiyan ya:
Wa Wi Lorn Fram Wa Jiizas Did Du?
2. Som piipl tek langga dan som piipl fi lorn di chuut, so wi afi tek wi taim wid dem.
Du Laik Wa Jiizas Did Du
3. Yuuz wan difrant wie fi elp dem. Ef yu fain se dem no waahn stodi di Baibl sed taim, no fuos dem. Wen a di rait taim, yu kyan yuuz som a wi vidiyo dem ar som a di ting dem we de pan di websait fi mek dem si wa gwaan pan wan Baibl stodi an ou it wuda elp dem ef dem du wan.
4. No tingk se dem fi a du wa sumadi els a du. Evribadi difrant. Ef yu si se sumadi iina yu fambili ar sumadi we yu a go bak go taak tu no riili waahn fi stodi di Baibl ar dem kyaahn si chuu sitn we di Baibl se, tingk bout wa mek dem mait-a fiil so. Im av sitn we im uona rilijan tiich we a wan big ting fi im? Im fambili dem ar piipl roun im a presha im? Gi dem taim fi tingk bout wa yu a tiich dem an gwaan tek yu taim wid dem so dat dem kyan si se wa di Baibl se mek sens fi chuu.
5. Prie fi di sumadi. Aks Jeuova fi elp yu fi luk pan tingz iina wan gud wie an fi nuo wa fi se an wen fi se it. An aks im fi elp yu fi nuo wen a di rait taim fi tap go bak tu sumadi we luk laik dem no waahn ier di gud nyuuz.—1 Kor. 9:26.
