BWELAINGA KU BANTU
LUFUNJISHO 8
Ikalai Batekanya
Jifunde: “Butemwe butekanya.”—1 Ko. 13:4.
Byaubanga Yesu
1. Tambai VIDYO, nangwa tangai Yoano 7:3-5 ne 1 Kolinda 15:3, 4, 7. Apa bino mwisambe ano mepuzho:
Ñanyi Bintu byo Twafunjilako kwi Yesu?
2. Twafwainwa kwikala batekanya mambo bantu bamo bapelawizha kuswa mambo awama o tusapwila. Pakuba bantu bakwabo babanda bingi.
Ubainga Byaubanga Yesu
3. Ingijishainga mashinda apusana pusana. Inge muntu kechi ubena kukeba kufunda Baibolo ne, kange mumukanjikizhenga ne. Umvwe kyakonsheka, ingijishai mavidyo nangwa bibaaba bimo bya mu mabuku etu kumukwasha kumvwisha byo kikala pa kufunda Baibolo ne byo afwainwa kumwenamo byawama.
4. Kange mwesakanyenga bantu ne. Bantu bapusana pusana. Inge wa mu kisemi nangwa muntu ye mwabwelako na kumona kechi ubena kukeba kufunda Baibolo nangwa kuswa byaamba Baibolo ne, mwipuzhai muyuke kyo akaina. Nanchi bintu bimo byo bafunjisha mu chechi mo aya byo byamulengela kukana nyi? Nangwa kampe balongo banji nangwa mo bekela kipikipi bo babena kumukanya nyi? Kumwendela lubilo ne, mutekenyai ne kumupako kimye kya kulanguluka pa byo mwamubuula ne kwimwena mwine byaamba Baibolo.
5. Lombelaingako bantu bakeba kufunda bukine. Lombainga kwi Yehoba kwimukwasha kuyuka muntu wabula kutemwa bukine ne po mwafwainwa kulekela kubwelako.—1 Ko. 9:26.