က့ၤကဒါက့ၤလၢအဝဲသ့ၣ်အိၣ်
တၢ်မၤလိ ၈
အိၣ်ဒီးတၢ်ဝံသးစူၤ
တၢ်ဂ့ၢ်လၢအရ့ဒိၣ် “တၢ်အဲၣ်တၢ်ကွံန့ၣ် ဝံသးစူၤတၢ်.”—၁ ကရံၣ် ၁၃:၄.
ယ့ၣ်ၡူးမၤဝဲဒ်လဲၣ်
၁. ကွၢ် တၢ်ဂီၤမူ ဒီး ဖး ယိၤဟၣ် ၇:၃-၅ ဒီး ၁ ကရံၣ်သူး ၁၅:၃, ၄, ၇. ဝံၤဒီးတဲသကိး တၢ်သံကွၢ်လၢလာ်တဖၣ်အံၤ–
ပမၤလိန့ၢ်တၢ်လၢ ယ့ၣ်ၡူးအအိၣ်ဒ်လဲၣ်
၂. ပှၤတနီၤန့ၣ် တတူၢ်လိာ် ပတၢ်သးခုကစီၣ် တဘျီဃီဘၣ်အဃိ ပကဘၣ်အိၣ်ဒီး တၢ်ဝံသးစူၤ.
ကွၢ်လိမၤဒိးယ့ၣ်ၡူး
၃. သူတၢ်စံၣ်တဲၤတဲလီၤတၢ် အကျိၤအကျဲအကလုာ်ကလုာ်. ပှၤမ့ၢ်တအဲၣ်ဒိး မၤလိလံာ်စီဆှံ ဒီးနၤဒံးဘၣ်န့ၣ် တဘၣ်မၢဆူၣ်အီၤတဂ့ၤ. တၢ်ခွဲးတၢ်ယာ်မ့ၢ်အိၣ်ထီၣ်န့ၣ် ပၠးအီၤတၢ်ဂီၤမူ မ့တမ့ၢ် တၢ်ဂ့ၢ်တခါခါ ဒ်သိး အကနၢ်ပၢၢ်ထီၣ်လၢ တၢ်မၤလိလံာ်စီဆှံန့ၣ် ပှၤမၤအီၤဒ်လဲၣ် ဒီးကကဲဘျုးလၢအဂီၢ်ဒ်လဲၣ်.
၄. ထိၣ်သတြီၤအီၤဒီးပှၤဂၤတဂ့ၤ. ပှၤတဂၤဒီးတဂၤန့ၣ် အတၢ်အိၣ်သး တဒ်သိးလိာ်အသးဘၣ်. နဟံၣ်ဖိဃီဖိတဂၤဂၤ မ့တမ့ၢ် ပှၤလၢနက့ၤဟးအိၣ်သကိးအီၤတဂၤ မ့ၢ်တအဲၣ်ဒိးမၤလိလံာ်စီဆှံ ဒီးတူၢ်လိာ်လံာ်စီဆှံ အတၢ်ဟံးစုနဲၣ်ကျဲဒံးဘၣ်န့ၣ် ဆိကမိၣ်ထံ ဘၣ်မနုၤအဃိ အဝဲသ့ၣ်မၤဝဲဒ်န့ၣ်လဲၣ်. မ့ၢ်အတၢ်ဘူၣ်တၢ်ဘါ အတၢ်စူၢ်တၢ်နာ်န့ၣ် အရ့ဒိၣ်လၢအဂီၢ် အိၣ်တခါခါဧါ. မ့ၢ်အဘူးအတံၢ် ဒီးပှၤလၢအခိၣ်အဃၢၤတဖၣ် ဆီၣ်သနံးအီၤအဃိဧါ. အဃိ ဒ်သိးအဝဲသ့ၣ် ကဆိကမိၣ်ထံဝဲ ဘၣ်ဃးဒီး တၢ်လၢနတဲအီၤ ဒီးကပာ်လုၢ်ပာ်ပှ့ၤ တၢ်လၢလံာ်စီဆှံတဲဝဲအဂီၢ် ဟ့ၣ်အီၤတၢ်ဆၢကတီၢ်.
၅. ဃ့ဘါထုကဖၣ်န့ၢ်တၢ်လၢ ပှၤလၢအသးအိၣ် တၢ်မ့ၢ်တၢ်တီတဖၣ်အဂီၢ်. ဃ့ယဟိဝၤယွၤလၢ နကဆဲးအိၣ်ဒီးတၢ်ထံၣ်လၢအဂ့ၤ ဒီးတဲတၢ်သ့သ့ဘၣ်ဘၣ်. ဒ်သိး နကသ့ၣ်ညါထီၣ်ဘၣ်လၢ နကဘၣ်ပတုာ်မၤလိ ပှၤလၢအတအဲၣ်ဒိး မၤလိာ်လံာ်စီဆှံ လၢအခါဖဲလဲၣ်အဂီၢ် ဃ့တၢ်မၤစၢၤလၢ ယဟိဝၤယွၤအအိၣ်တက့ၢ်.—၁ ကရံၣ် ၉:၂၆.
