HAO FOR CONTINUE LO STORY
LESON 8
Patient
Principle: “Man wea garem love hem patient.”—1 Cor. 13:4.
Wat Jesus Duim
1. Watchim VIDEO, or readim John 7:3-5 and 1 Corinth 15:3, 4, 7. Then ting raonem olketa kwestin hia:
Wat Nao Iumi Lanem From Jesus?
2. Iumi need for patient bikos hem tek taem for samfala pipol acceptim gud nius.
Followim Example blo Jesus
3. Traem olketa difren wei. If datfala man no kwiktaem for acceptim Bible study, no forcem hem. Lo taem wea fitim, iusim olketa video or article for helpem hem minim wat nao iumi duim lo wanfala Bible study and hao hem savve kasem gud samting.
4. No comparem man witim narawan. Evriwan no semsem. If wanfala famili member or return visit no laek for studyim Bible or acceptim wanfala Bible teaching, ting raonem why hem olsem. Hao, hem strong lo wanfala biliv blo hem? Hao, hem kasem pressure from olketa relative or olketa narawan? Givim hem taem for ting raonem wat iu talem and for tinghae lo wat Bible talem.
5. Prea for man wea interest. Askem Jehovah for helpem iu gohed garem positive tingting and savve hao for helpem hem. Prea for Jehovah helpem iu luksavve if man no really interest and iu shud stop for visitim hem.—1 Cor. 9:26.
