KʼUXI XUʼ XAPAS AREVISITA
XCHANOBIL 8
Oyuk smalael avuʼun
Beiltasel ta Vivlia: «Li kʼanelale xmalaj yuʼun» (1 Kor. 13:4).
¿Kʼuxi laj yakʼ ta ilel li Jesuse?
1. Kʼelo li VIDEOE o kʼelo Juan 7:3-5 xchiʼuk 1 Korintios 15:3, 4, 7. Laje, nopbo skʼoplal liʼe:
¿Kʼusi chakʼ jchantik li kʼusi la spas Jesuse?
2. Junantik krixchanoetike toj vokol chaʼiik xchʼamel li mantale, jaʼ yuʼun skʼan oyuk smalael kuʼuntik.
Paso li kʼusi la spas Jesuse
3. Jelo li kʼusi chapase. Mi mu skʼan xchʼam chanubtasel ta Vivlia li jun krixchanoe, mu xapakʼalinbe. Mi xuʼ chavile, akʼbo yil videoetik o mantaletik ti chalbe skʼoplal kʼu yelan li chanubtasel chkakʼtike xchiʼuk ti kʼusi sbalil tstabee.
4. Mu xakoʼoltas xchiʼuk yantik. Jkotoltik jelelutik. Mi mutik lek skʼan chanubtasel ta Vivlia o mu xchʼun lek kʼusi chal Vivlia junuk avutsʼ avalal o li buchʼu chbat achaʼvulaʼane, nopbo skʼoplal kʼu yuʼun. ¿Mi oy van jtosuk chanubtasel ta srelijion ti tsots skʼoplal chaʼie? ¿Mi jaʼ van ta skoj ti oy kʼusi ch-albat yuʼun li yutsʼ yalal o li slakʼnatake? Akʼo jelavuk kʼuk sjalil sventa snopbe skʼoplal li kʼusi aloʼiltaojik xa onoʼoxe xchiʼuk sventa xakʼ venta ti ep sbalil li kʼusi chal Vivliae.
5. Albo skʼoplal ta a-orasion li arevisitae. Kʼanbo Jeova ti akʼo skoltaot sventa mu xalubtsaje xchiʼuk ti jechuk-o xavakʼ ta ilel slekil avoʼontone. Jech xtok, kʼanbo apʼijil sventa xanaʼ mi skʼan xavikta svulaʼanel li buchʼu muʼyuk mas ta yoʼonton mantale (1 Kor. 9:26).
