YEME’E BO MINJOMAN
AYÉ’É 9
Yeme’e wô’ô bôt éngôngol
Ñye’elan: “Vaka’ané a ba ba vak; yônané a ba ba yôn.”—Rom. 12:15.
Jame Yésus a nga bo
1. Yene’e VIDÉO, nge ke na lañe’e Marc 6:30-34. Mvuse ya valé fase’e minsili mi:
Éve’ela Yésus ja ye’ele bia jé?
2. É ne été na bia yiane kañete bôte mbamba foé, ve bia yiane fe jeñe na bi volô be.
Bo’o ane Yésus
3. Nyoñe’e éyoñe ya vô’ôlô. Va’a môte fane ya kate wo mame me ne nye nlem été. Te tyi’i nye nkobô, te biasé mame ma tyelé nye nleme yôp, minju’u mié nge ke mame ma bo na a bene nyoñe wo mvo’é. Éyoñe wo kôme nyoñ éyoñe ya vô’ôlô nye, wo liti na wo nyoñe ngap a asimesane dé.
4. Te vuane môt a te liti na a nye’e minlañe mia nye mia laan. Éyoñe wo fase minlañe mia nye mia te bi, sili’i womiene na:
5. Kate’e môte mame ma jalé miñyiane mié. Nné ane wo bi fane ya bo de, liti’i nye aval ayé’é ya Kalate Zambe é ne ve nye biyalane ya minsili mié, a mbamba melep asu ényiñe ya môs ôse.