ADƲWAVƲLƆYƐLƐ
OZUMALƐDƖYƐ 10
Si Wʋ Kɛnɣa
Egyinalɛzʋ-odwokɔ: “Kɛ Odwokɔba nɩ mɔɔ ɩzʋ̃ Nyamɩnlɩ ɛkɛnɩ nɩ nkʋ̃ la, yɛ yɛbɛlɩ kɛɛ yɛkɔwɔ yɩ ɛlawulo yekehile mʋnlʋmmɔ a. Na yɛbɛlɩ yɩ sʋ̃ kɛɛ ankɩ yekowu yɛkɛma mʋnlʋmmɔ. Sianti yɛ lɛ kɛɛ, mʋnlʋmmɔ bɔ nwʋ ihyinyia yɛ sʋ̃maa.”—1 Tɛs. 2:8.
Mɔɔ Gyisɛsɩ Yɛlɩ
1. Kila VIDIYO yi, anzɛnyɩɩ kɩnga Dwɔɔnʋ 3:1, 2. Akʋ̃ bozunzu ndwokɔɣizialɛ mɔɔ ilili zʋlɔ yɩ nwʋ:
-
Ekila a, mɩnla ti mɔɔ Nikodemɔsʋ hɔlɩ Gyisɛsɩ yɩ pɛ wɔ nunuma a?—Kila Dwɔ. 12:42, 43.
-
Mɩnla ɔhʋanɩ zʋ yɛ Gyisɛsɩ lalɩ yɩ ali kɛɛ nɩ izi yɩ kɛnɣa kɛɛ ɩkɛyɛ mmenii adʋwavʋlɔ a?
ɩnla Yɛ Yesuma Wɔ Gyisɛsɩ Kɛnɩ a?
2. Iluwakɛɛ yɛdɔ mmenii nɩ ti, yezi yɛ kɛnɣa kɛɛ yɛkɔwʋwa bɛ ma bɛkɛɣa bɛkɛyɛ adʋwavʋlɔ.
Sumazuma Gyisɛsɩ
3. Ɛ nɩɩ wʋ Bayɩbʋlʋ dɩyɛzumanlɛvʋlɔ yɩ zumá dɩyɛ wɔ mmɩlɩ nɩɩ dɩka mɔɔ ɩdɩ baaba ɩma yɩ. Ebiye a, yɩ anyɩ keleli nwʋmɔ kɛɛ bokozuma dɩyɛ wɔ mmɩlɩ anzɛnyɩɩ eɣile pɔkyɩɩ be wɔ dapɛnɩ yi nu. Asʋ̃ ɩkɛbɛ kɛɛ ɛ nɩɩ yɩ kozuma dɩyɛ wɔ yɩ awudo, yi egyima nu anzɛnyɩɩ dɩka fʋlɔ be a? Sɛ ɩkɛyɛ bʋwɔ a, sɩnza wʋ mmɩlɩ nhyɩhyɛlɩyɛ nu na ama wʋahʋla ɛ nɩɩ yɩ azuma dɩyɛ wɔ mmɩlɩ nɩɩ dɩka mɔɔ ɩkɔwʋwa yɩ.
4. Áma etindiã dɩyɛzumanlɛ yɩ nu. Sɛ okodu ɔhʋanɩ a, áma eyiaki dɩyɛzumanlɛ yɩ tiã nu. Mfomi, bizia wʋ nwʋ kɛɛ:
-
Asʋ̃ mʋkɔhʋla mɩkɛyɛ dɩyɛzumanlɛ yɩ eɣile fʋlɔ wɔ dapɛnɩ yɩ nu a?
-
Asʋ̃ mʋkɔhʋla mɩkɛyɛ dɩyɛzumanlɛ yɩ wɔ foonu anzɛnyɩɩ vidiyo-kɔɔlʋ zʋ a?
-
Asʋ̃ mʋkɔhʋla mɩkɛma ɛlawulowɔlɛvʋlɔ fʋlɔ kɔhɔ kɛyɛ dɩyɛzumanlɛ yɩ kɛma mɩ a?
5. Bɔ́ mpayɩ fa pɩbɛ adwɩnɩba. Sɛ Bayɩbʋlʋ dɩyɛzumanlɛvʋlɔ yɩ tindiã dɩyɛzumanlɛ yɩ nu anzɛnyɩɩ ɩyɛ sɩ kɛɛ ɩkɛva mɔɔ bosumaa nɩ ɩkɛyɛ egyima po a, siã Gyehova kɛɛ ɩwʋwa wʋ ma ɔhɔ zʋlɔ ɛ nɩɩ yɩ zuma dɩyɛ. (Fɩl. 2:13) Siã Gyehova kɛɛ ɩwʋwa wʋ ma ɛva wʋ adwɩnɩ ziye subanɩba mɔɔ wʋ Bayɩbʋlʋ dɩyɛzumanlɛvʋlɔ yɩ lɛ nɩ zʋ.
