IRỌRỌ ENE EBI UDUN̄ KÈ KARAIS
INU NKWEEN̄10
Sa Otutuuk Ejit Kwun̄ Rọ
Onineen̄ Baibul: “Eji kpeche ata etip eyi Awaji gaalek inyi enyi, eji mîsa me ubelejit iche si lek kiji igbaalek inyi enyi mije, eji mîmun̄ enyi me chieen̄ enenen.”—1 Tes 2:8.
Inu Jisọs Orọbe
1. Kpọ FIDIO yi, mè iyaka ire fuk Jọn 3:1, 2. Mè fọọk idodo chi ogọgọọk:
-
Keke ke okeek ibe ire inu orọrọ Nikodimọs onube me lek Jisọs me eririeen̄?—Kpọ Jọn 12:42, 43.
-
Ike owa ke ubọk Jisọs osa igọọk Nikodimọs ikpa usem me eririeen̄ osa ijeen̄ ibe ke isasa otutuuk ejit kan̄ inyi irọrọ ene ebi udun̄ kan̄?
Keke Ke Eji Ekween̄ Inan̄a Me Lek Jisọs?
2. Eji ekijeen̄ ibe ke eji mima ebi ene sa me isasa otutuuk ejit kiji inyi irọrọ ebi ene ebi udun̄ kè Karais.
Gọọk Akpat Ukot Jisọs
3. Kisun̄ nkween̄mkpọ Baibul me mgbọ mè ere otatat me lek ogwu okigọọk ikween̄ mkpọ. Mokọt iweek ibe enyi ekekween̄ mkpọ me okpọkpọ usen ge me nde mè iyaka ire okike mgbọ ge me usen. Ire moma ibe ekekween̄ mkpọ me ere ikwaan̄ kan̄, uwu kan̄, mè iyaka ire ere ebi ene ekitọbọ efuuk ni? Ire ifet, nwene inu okirọ inyi omokọt ikisun̄ nkween̄mkpọ me ere mè mgbọ onwọnwọn inyi ogwu okigọọk ikween̄ mkpọ.
4. Kisun̄ nkween̄mkpọ ya mgbọ geelek. Ire obokọp uran̄, kajuuk nkween̄mkpọ ya itele. Kpan̄asi ikeya, keek-nu mè ire:
5. Kiriaak uriaak ibe okaan̄ ejit otatat. Beek Jioba ibe itap ubọk inyi owu mè okawọ lek me lek ogwu okigọọk ikween̄ mkpọ, ikerere ibe ke ikakikween̄ mkpọ mgbọ geelek mè iyaka ire ikakigwat lek ikitap inu ikikween̄ me ugwem kan̄. (Filip 2:13) Usini mgbọ, ogwu okigọọk ikween̄ mkpọ ira ikaan̄ owuwa ata eru, beek Jioba ibe itap ubọk inyi owu okọt oto chieen̄ me lek ata eru cha.
