NYƆ ƁÈ ÐEÍN-NÀ-NYƆ̀ MÚ-NYU-NYU
CƐ̃́Ɛ́-ÐƐ̀ 10
Ðɛ-Kɔ̃-Jìɖììn-Jìɖììn
Hwìè-da-zàìn-wùɖù: “Ɔ se ma bɔ̃́ nɔ̀mɔ̀ dyíinɔ̀ ɖòùn, kɛɛ à dyé ma ti ɓɛ́ à ké ma à mìɔùn nììn fɛ̀ɛ̀ɔ̀ ɓè nyí ɖekè, sepoɛɖe ɓè jè kpɔ̃ ma à hwòɖò mìɔ.” —1 Tɛ̀s 2:8.
Ðɛ Jízɛ̀ Nyu Ma Kɛ
1. Dyé VÍÐÒƆ̀ dyi, mɔɔ zà Jɔ̃́ɔ́ 3:1, 2 wuɖuún. Nìí, poìn dyi-diè-ɖɛ̀ ɓè kɔà ɓó dyíɛɛ jè hwìɖìi:
-
Xwíníínɔ̀ nyɛ́ kɔ̃̀ jè Nìkòdímà wùɖù ma kà Jízɛ̀ gbo ɓó máaún-kà kɛ́?—Dyé Jɔ̃́ɔ́ 12:42, 43.
-
Dyììn ɖé Jízɛ̀ kè Nìkòdímà dyéìn-dyéìn mú ɓó máaún-kà kɛɛ, xwɛ̀ Jízɛ̀ nyuɛ ma tɛ̀mɛ̀ìn kà ɔ jìɖìɛ̀n ma kɔ̃, ɓɛ́ ɔ ké ma nyɔ ɓè ɖeín-nà-nyɔ̀ mú nyu kɛ́?
Ðɛ́ À Cɛ̃́ Jízɛ̀ Xwaún Wɛ̃́?
2. À tɛ̀mɛ̀ìn kà à ɖɛ̀ɓɛ̀ nyɔ ɓè múɛ ɔ jù ké à dyiɛ kɔ̃ jìɖììn ɓɛ́ à ké nyɔ ɓè gbo kpá, ɓɛ́ wa ké ɖeín-nà-nyɔ̀ ɓè jù ní.
Sí Jízɛ̀ Ɓo-Bɛ̃̀ìn
3. Ɓè cɛ̃́ ɖɛ ɓó ti kè dɛ̀ mu dyíin nɔ̀mɔ̀ùn ɓó nì ɖɛ-cɛ̃́-nyɔ̀ɔ̀ bììɛ. Ɔ ɓɛ́ìn dyɛ̀ wé jɛ́ɛ́ ɖò mɔɔ ti jɛ́ɛ́ ɖò mɔ́ɔ. Ɔ muɛ mú ɖɛ̀ɓɛ̀ìn ɓɛ́ ɔ ké ɖɛ cɛ̃́ ɖé ɔ kũ̀à-nyùìn-naínǹ, mɔɔ ɖé ɔ ɓíɖí-taúnǹ, mɔɔ dà kà kò ɖòò? Ɔ jù ké m̀ dyiɛ nyuɛ ɓɛ́ìn ní, zĩàìn nì tiɔ̀ gbo ɓó nyɔɔ̀ gbo kpá jè.
4. Ɓè cɛ̃́ ɖɛ ti séín. Ɔ jù ké m̀ dyi da muɛ́ mu ní, ɓɔ́ ɖɛ-cɛ̃́-cɛ̃́ɔ̀ ɓɔ́í poɛ. Kɛɛ, m̀ mɛ poìn ɖɛ ɓè nìà kɛ jè hwìɖìi:
-
Ɓè ɓɛ́ìn ɖɛ-cɛ̃́-cɛ̃́ɔ̀ nyuɛ ɓó ti kà kò ɖò ɓaɖa ɓó wíkì dyúáɖòɔ̀ xwíníínǹ?
-
Ɓè ɓɛ́ìn ɖɛ-cɛ̃́-cɛ̃́ɔ̀ nyuɛ ɖé gàɖàfo-ɖúú mɔɔ íntànɛ́ɛ̀ kɔ̃ɔ̀?
5. Ɓaà ɓɛ́ m̀ ké ɖɛ dya gmɔ̀ dyí-sɛ́ɖɛ́ìn-kà. Zɔ̀ìn Jɛhova gbo-kpá-sɔ̃̀, ɓɛ́ m̀ ké nì ɖɛ-cɛ̃́-nyɔ̀ɔ̀ gbo kpá jè kɔ̃ jìɖììn kóɖó-kóɖó, kɛbì ɔ mɛ se ɖɛ cɛ̃́ɛń nì ti séín, mɔɔ ɔ mɛ se Baɓoɔ náún-po-wùɖù séín dyi kpɔ̃uń nìɛ. (Fèɖ 2:13) Nì ɖɛ-cɛ̃́-nyɔ̀ɔ̀ ɓɛ́ìn dyɛ̀ kpeɖe nɔ̀mɔ̀ dyíin pàɖà ɓéɖéɛ; ɓaà ɓɛ́ m̀ ké kpeɖe ɓèa dya gmɔ̀.
