SI TA HACE MAGA DICIPULO
LECCION 10
Determinacion
Principio: “Cay bien quiere gayot came con ustedes, preparao came gendeh lang para comparti con ustedes el Buen Noticia, sino hasta para dale el diamon vida tamen.”—1 Tes. 2:8.
Si Cosa Ya Hace si Jesus
1. Mira con el VIDEO o le con el Juan 3:1, 2. Despues, considera con el siguiente pregunta:
-
Porque gaha denoche si Nicodemo ya visita con Jesus?—Mira con el Juan 12:42, 43.
-
Paquemodo ya dale mira si Jesus que determinao le hace maga dicipulo?
Cosa Kita Puede Aprende con Jesus?
2. Ta dale kita mira que ta ama kita con el maga gente si determinao kita ayuda kanila para queda maga dicipulo.
Imita con Jesus
3. Estudia na tiempo y lugar que conveniente para con el de tuyu Bible study. Posible, mas quierre le estudia na un especifico hora o dia del semana. Mas comfortable ba le estudia na de suyu trabajo, na de suyu casa o na un publico lugar? Si posible, man adjust con el de tuyu schedule para puede tu man Bible study con ele na tiempo que conveniente con ele.
4. Regular hace con el estudiada. Si gendeh tu puede man Bible study con el persona na un particular dia, no cancela con el estudiada. Sino, considera con este:
-
Puede ba tu conduci con el estudiada na otro dia de ese semana?
-
Puede ba tu hace con el estudiada por medio na telefono o na videoconference?
-
Puede ba tu pidi con el otro publisher que conduci con el estudiada?
5. Reza que tene tu el justo mirada. Pidi con Jehova que ayuda contigo esta determinao ayuda con el de tuyu estudiante, maskin pa tan dificil le regular man Bible study o aplica con el un consejo na Biblia. (Fil. 2:13) Posible que manada maga buen calidad el de tuyu estudiante. Reza con Jehova que ayuda contigo man focus con ese maga calidad.
