DIHANG MAGHIMOG TINUN-AN
LEKSIYON 10
Determinado
Prinsipyo: “Kay gimahal mo namo pag-ayo, determinado mi sa pagpaambit kaninyo sa maayong balita sa Diyos ug sa paghatag sa among kinabuhi sa pagtabang kaninyo.”—1 Tes. 2:8.
Ang Gihimo ni Jesus
1. Tan-awa ang VIDEO, o basaha ang Juan 3:1, 2. Dayon konsideraha ang mosunod nga mga pangutana:
-
Ngano kahang panahon sa kagabhion man miduol si Nicodemo kang Jesus?—Tan-awa ang Juan 12:42, 43.
-
Pinaagi sa pagpakig-estorya kang Nicodemo panahon sa kagabhion, sa unsang paagi gipakita ni Jesus nga determinado siya sa paghimog tinun-an?
Unsay Atong Makat-onan Kang Jesus?
2. Kay gihigugma nato ang mga tawo, determinado tang tabangan sila nga mahimong tinun-an.
Sundoga si Jesus
3. Magtuon sa oras ug lugar nga kombenyente sa imong Bible study. Basin naa siyay gusto nga espesipikong adlaw o oras. Asa siya mas komportable nga magtuon mo—sa iyang trabahoan, sa iyang balay, o sa publikong lugar? Kon posible, i-adjust ang imong eskedyul aron makatuon mo sa oras ug lugar nga gusto niya.
4. Himoa nga regular ang inyong pagtuon. Kon wala ka sa eskedyul sa inyong pagtuon, ayaw nig kanselaha. Hinuon, konsideraha ni:
-
Puwede kaha mong magtuon pinaagig telepono o videoconferencing?
-
Puwede kaha kang mohangyo ug laing igsoon nga maoy modumala?
5. Iampo nga magpabilin kang determinado. Hangyoa si Jehova nga tabangan kang magpabiling determinado, bisan pag ang imong Bible study dili regular sa inyong pagtuon o nalisdan sa pagpadapat sa mga tambag sa Bibliya. (Filip. 2:13) Lagmit daghag maayong hiyas ang imong Bible study; iampo nga tabangan kang mapokus niana.
