NE̱NI TIMBISE̱ BATO BOKWEDI
BELĒDI 10
Ko̱di
Bete̱sedi: ‘E ta e do̱lisane̱ biso̱, seto̱ o bola bińo̱ myango ma bwam ma Loba mo̱me̱ne̱, nde na longe̱ lasu mo̱me̱ne̱ pe̱; ebanja di ta di máto̱ndo̱ bińo̱ jita.’—1 Tes. 2:8.
Nje Yesu a bolino̱
1. Ombwa SINIMA, to̱so̱ langa Yohane 3:1, 2. Denge̱ o madutea ońola myuedi mi mabupe̱:
-
Ońola nje Nikodemo a po̱sino̱ nde wala pe̱pe̱le̱ Yesu bulu e?—Langa Yohane 12:42, 43.
-
Ne̱ni Yesu a lee̱le̱no̱ ná a ta ko̱di o timbise̱ bato bokwedi ponda a kasino̱ Nikodemo bulu e?
Nje di mokwano̱ na Yesu e?
2. Di malee̱le̱ ná di to̱ndi bato ke̱ je ko̱di o jongwane̱ babo̱ o timba bokwedi.
Embilane̱ Yesu
3. Tombise̱ moto jokwa o ponda na wuma ba do̱lisane̱ mo̱. E ná a do̱lisane̱ buńa bō̱ ba tobotobo ba woki, to̱ pond’a tobotobo po̱ ńa buńa. Mo̱, e nde ná a to̱ndo̱ jokwa o wum’ao y’ebolo, o mbo’ao, to̱ o wum’a ntelele e? E we̱li te̱ be̱, tukwa pond’ango̱ ná lo we̱le̱ jokwa o ponda na wuma ba do̱lisane̱ mo̱.
4. Bińo̱ okwa ponda ye̱se̱. Yete̱na o si me̱nde̱ be̱ne̱ ponda, o si tonse̱ jokwa. Ombwea nde ne̱ni:
5. Kane̱ ná o si bo̱lo̱ne̱ dipita. Kane̱ Yehova ná ongwane̱ wa ná o be̱ ko̱di o jongwane̱ mokwe̱ Bibe̱l, to̱ e be̱ nde ná a si mokwa ponda ye̱se̱, to̱ ná e muńo̱ngo̱ o we̱le̱ nje a mokwano̱ o ebolo. (Fil. 2:13) Yen ebe nu mokwe̱ Bibe̱l a be̱n jita la bede̱mo ba bwam; kane̱ Yehova ná o soke̱ nde mo̱nge̱le̱ mo̱ngo̱ oten.
