NAM MME OWO ẸDI MBET JESUS
UKPEPN̄KPỌ 10
Sịn Idem Nam Mme Owo Ẹdi Mbet
Se Bible Etịn̄de: “Nnyịn ima inen̄ede ikop inemesịt, idịghe ke edinọ mbufo eti mbụk Abasi kpọt, edi n̄ko ke edinọ mbufo ukpọn̄ nnyịn, sia nnyịn inen̄erede ima mbufo.”—1 Thess. 2:8.
Se Jesus Akanamde
1. Se VIDIO oro, mîdịghe kot John 3:1, 2. Ekem bọrọ mme mbụme emi:
-
Ekere ke nso ikanam Nicodemus aka ebịne Jesus okoneyo? —Se John 12:42, 43.
-
Didie ke Jesus ndikeneme nneme ye Nicodemus okoneyo owụt ke enye ama esisịn idem anam mme owo ẹdi mbet esie?
Nso ke Ikpep Ito Jesus?
2. Iwụt ke imama mme owo edieke isịnde idem in̄wam mmọ ẹdi mbet Jesus.
Kpebe Jesus
3. Kpep owo Bible ke ini ye ebiet emi ọfọnde ye enye. Enye ekeme ndimek usen m̀mê ini emi ọfọnde ye enye. Ndi enye eyenen̄ede ama ekpep enye Bible ke itieutom esie, ke ufọk esie, m̀mê ke itie en̄wen? Edieke ekemede, kpụhọde ndutịm fo man ekeme ndikpep enye Bible ke ebiet ye ini emi enye enịmde.
4. Sikpep enye n̄kpọ kpukpru ini. Kûtre ukpepn̄kpọ ke ntak mûdụhe. Utu ke oro, kere ise:
-
Ndi emekeme ndida fon m̀mê vidio conference n̄kpep enye n̄kpọ?
-
Ndi emekeme ndidọhọ eyenete en̄wen an̄wam fi ekekpep enye n̄kpọ?
5. Bọn̄ akam ben̄e Jehovah an̄wam fi anam nnennen n̄kpọ. Ben̄e Jehovah an̄wam fi esịn idem ekpep owo emi afo esikpepde enye Bible, ekpededi enye isikpepke kpukpru urua mîdịghe ọsọn̄ enye ndidu uwem nte Bible ọdọhọde. (Phil. 2:13) Owo emi esikpepde n̄kpọ ekeme ndinyene nsio nsio nti edu; ben̄e Jehovah an̄wam fi okụt mme edu oro.
