KAREKEIA TAAN RIMWINI KRISTO
REIREI 10
Kamatoaa Nanom
Te boto n reirei: “Ti a motikia bwa ti na anganingkami tiaki tii ana rongorongo ae raoiroi te Atua, ma boni ngaira naba, kioina ngkai kam rangi n tangiraki iroura.”—1Tet. 2:8.
Te Baere E Karaoia Iesu
1. Mataku n te TAAMNEI, ke wareka Ioane 3:1, 2. Imwina ao nori titiraki aikai:
-
Bukin tera ngke e kukurei riki Nikotemo ni kawara Iesu n te bong?—Nora Ioane 12:42, 43.
-
Ngke e maroro ma Nikotemo n te bong, e kangaa Iesu ni kaotia bwa e kamatoaa nanona ni kani karekeia taan rimwina?
Tera Reireiara Mairoun Iesu?
2. Ti kaotia bwa ti tangiriia aomata n arora ni kamatoaa nanora ni buokiia bwa a na riki bwa taan rimwini Kristo.
Kakairi Iroun Iesu
3. Reirei n te tai ao n te tabo ae angaraoi ma am reirei n te Baibara. Tao e bae n tangira te bong teuana i nanon te wiki ke tao te aoa iraua. E na mwengaraoi ngkana e reirei n ana tabo ni mwakuri, ni mwengana, ke n ana tabo te botannaomata? Ngkana ko konaa, kaangaraoa am babaire nakon are e raoiroi irouna.
4. Katoatai n reirei. Ngkana ko na nakonako, tai katoka te reirei. Ma iangoi aikai:
-
Ko kona ni karaoa te reirei n te bong riki teuana n te wiki anne?
-
Ko kona ni karaoa am reirei rinanon te tareboon ke tao te intanete?
-
Ko kona n tuanga te tia uarongorongo temanna bwa e na karaoia?
5. Tataro ibukin te iango ae riai. Bubutiia Iehova buokam bwa ko na aki kabwaraa nanom iroun am reirei n te Baibara, e ngae naba ngkana e kangaanga irouna te katoatai n reirei ke maiuakinan te reirei ni kairiri man te Baibara. (IBir. 2:13) E boni bae ni bati aroarona aika raoiroi, ngaia are tataroa buokam bwa ko na kaatuua am iango i aoia.
