PANAGARAMID ITI ADALAN
LEKSION 10
Determinado
Prinsipio: “Determinadokami a nangipaay kadakayo, saan laeng a ti naimbag a damag ti Dios, no di pay ket ti mismo a biagmi, gapu ta ay-ayatendakayo unay.”—1 Tes. 2:8.
Ti Inaramid ni Jesus
1. Buyaem ti VIDEO, wenno basaem ti Juan 3:1, 2 sa sungbatam dagitoy a saludsod:
-
Apay a kayat ni Nicodemo ti makisarita ken Jesus iti rabii?—Kitaen ti Juan 12:42, 43.
-
Kasano a ti pannakisarita ni Jesus ken Nicodemo iti rabii ipakitana a determinado isuna nga agaramid iti adalan?
Ania ti Masursurotayo ken Jesus?
2. Ipakpakitatayo nga ay-ayatentayo dagiti tattao no determinadotayo a tumulong kadakuada nga agbalin nga adalan.
Tuladem ni Jesus
3. Agadalkayo iti oras ken lugar a kombiniente iti iyad-adalam. Mabalin nga adda ti espesipiko nga aldaw ken oras a kayatna. Mas komportable kadi nga agadal iti pagtrabahuanna, iti balayna, wenno iti publiko a lugar? No posible, baliwam ti eskediulmo tapno makapagadalkayo iti oras ken lugar a kayatna.
4. Regular nga iyadalam. No adda papanam, saanmo a kanselaren ti panagadalyo. Imbes ketdi, panunotem:
-
Mabalinyo kadi ti agadal iti sabali nga aldaw iti dayta a lawas?
-
Mabalinyo kadi ti agadal babaen ti telepono, selpon, wenno videoconferencing?
-
Adda kadi sabali a kabsat a mabalinmo a kasarita a mangyadal kenkuana?
5. Ikararagmo nga agtalinaedka a positibo. Agpatulongka ken Jehova tapno determinadoka latta a mangyadal uray no saan a regular a makapagadal ti iyad-adalam wenno marigatan a mangyaplikar kadagiti nasursurona. (Fil. 2:13) Mabalin nga adu dagiti nasayaat a kualidad ti iyad-adalam. Ikararagmo a dagita ti pagpokusam.