ЦІЫХУР БИБЛИЕМ ЩЕБГЪАДЖЭКІЭ
10 УРОКЫР
Псэемыблэжу цІыхум дэІэпыкъу
Библием ит принципыр: «Тхьэм деж къикІ хъыбарыфІыр фхуэтІуэтэн къудейр аркъым дызыхуеяр, атІэ ди псэр фхуэттынуи дыхуеящ. АпхуэдизкІэ фІыуэ фытлъэгъуащ» (1 Фес. 2:8).
Хьисэ и щапхъэр
1. ВИДЕОМ еплъ е Иуан 3:1, 2 итым къеджи, мы упщІэхэм егупсыс:
-
1) Дауэ уеплърэ, Никодим Хьисэ и деж жэщу сыт щІэкІуар? (Иуан 12:42, 43 итым еплъ.)
-
2) Хьисэ жэщу Никодим зэрепсэлъам дауэ къызэрыхэщыр ар и къарум щымысхьу и гъэсэнхэр игъэхьэзыру зэрыщытар?
Хьисэ и щапхъэм дызыхуригъасэр
2. Хьисэ и лъэужь иувэну цІыхухэм дадэІэпыкъун щхьэкІэ тхузэфІэкІыу хъуар тщІэмэ, дэ къыдогъэлъагъуэ ахэр фІыуэ зэрытлъагъур.
Хьисэ щапхъэ тех
3. Ебгъаджэр нэхъ щыхуэхъу зэманымрэ щІыпІэмрэ къыхэх. ЦІыхум Библие иджыну щыхуэхъур зы зэман е зы махуэ хэха гуэру къыщІэкІынкІэ хъунущ. Уи гъусэу еджэну дэнэ абы нэхъ щыфІэтыншынур: лэжьапІэра, унэра хьэмэрэ нэгъуэщІ щІыпІэ гуэр? Езым нэхъ зэрыфІэтыншым хуэдэу уи графикыр зэрытебухуэным зэрыхъукІэ хущІэкъу.
4. Тхьэмахуэ къэс феджэ. Зэман гуэркІэ ущымыІэнумэ, Библие джыныр зэпумыгъэу. Егупсыс:
-
1) А тхьэмахуэм нэгъуэщІ махуэм е зэманым йомыгъэджэфыну пІэрэ?
-
2) Библие джыныр видеосвязькІэ е телефонкІэ йомыгъэкІуэкІыфыну пІэрэ?
-
3) НэгъуэщІым уемылъэІуфыну пІэрэ уи пІэкІэ Библие джыныр иригъэкІуэкІыну?
5. ЕплъыкІэ тэмэм уиІэну Алыхьым елъэІу. ЦІыхум Библие джыныр дигъэхумэ е къищІэр и гъащІэм занщІэу къыщимыгъэсэбэпмэ, уи Іэр иумыхьэх. Апхуэдэм деж Иеговэ елъэІу ебгъаджэм уи гугъэр хыумыхыжыну къыбдэІэпыкъуну (Флп. 2:13). Ебгъаджэм хьэл-щэныфІ куэд хэлъу къыщІэкІынщ. Абыхэм уи акъылыр тебухуэну Иеговэ къыбдэІэпыкъуну елъэІу.