KULUTA BATU KUBA BALUTIWA
TUTO 10
Mueze Momukonela Kaufela Kuluta Batu
Sikuka: “Neluikatulezi kumifa taba yende ya Mulimu, mane cwalo ni bupilo bwaluna, kakuli nemubile balatiwa baluna.”—1 Mates. 2:8.
Zanaaezize Jesu
1. Mubuhe VIDIO, kamba mubale Joani 3:1, 2. Hasamulaho, munyakisise lipuzo zelatelela:
-
Ki kabakalañi Nekudema hanaaile ku Jesu busihu?—Mubone Joani 12:42, 43.
-
Jesu naabonisize cwañi kuli naaisa pilu kwa kutusa batu kuli babe balutiwa?
Luitutañi ku Jesu?
2. Lubonisa kuli lwalata batu halueza molukonela kaufela kubaluta kuba balutiwa.
Mulikanyise Jesu
3. Muitutange ni muituti wamina wa Bibele ka nako yatabela ni kwa sibaka saketile. Mwendi ukona kuketa lizazi latabela kuituta mwa sunda ni nako yeswanela. Mwendi ukona kutabela kuitutela kwa mubeleko wahae, kwa ndu yahae, kamba kwa sibaka sesiñwi cwalo. Mueze momukonela kaufela kuli muitutange ni yena ka nako yatabela ni kwa sibaka saketile.
4. Muitutange kamita. Haiba hamuna kubateñi, musike mwaatula feela kuli hamuna kuituta. Kono muipuze kuli:
-
‘Kana nakona kuzamaisa tuto ye fa lizazi lisili mwa sunda ye?’
-
‘Kana nakona kuyo ituta ni yena ka kuitusisa foni kamba progilamu yekonahalisa kubonana ni yena?’
-
‘Kana nakona kukupa muhasanyi yomuñwi kuli ayo zamaisa tuto yeo?’
5. Mulapele ku Jehova kuli amituse kuba ni mubonelo oswanela. Mukupe Jehova kuli amituse kuli musike mwazwafa haiba muituti wamina kumubela taata kuitutanga kamita kamba kusebelisa lika zaituta mwa Bibele. (Mafil. 2:13) Mwendi muituti wamina unani tulemeno totunde totuñata; mukupe Jehova kuli amituse kuisa pilu kwa tulemeno to.
