DIVUIJA BANTU BAYIDI
DILONGESHA 10
Didifila
Dîyi dia kulonda: “Katuvua badisuike bua kunupesha anu lumu luimpe lua Nzambi nkayalu to, kadi ne kudifila kabidi ne tuetu bine, bualu nuvua balue banangibue bikole kutudi.”—1 Tes. 2:8.
Tshivua Yezu muenze
1. Tangila FILME, anyi bala Yone 3:1, 2. Pashishe welangane meji a nkonko idi ilonda eyi:
-
Bua tshinyi butuku ke buvua Nikodemo mua kuikala yeye mumone bukumbane bua kuyukila ne Yezu? —Tangila Yone 12:42, 43.
-
Pavua Yezu mutuilangane ne Nikodemo butuku abu, mmunyi muakalejaye ne: uvua mudifile mu mudimu wa kuvuija bantu bayidi?
Dilongesha
2. Tudi tuleja mutudi banange bantu patudi tudifila bua kubavuija bayidi.
Idikija Yezu
3. Longeshila mulongi webe muaba udiye musue, pa dîba didiye musue. Pamuapa mulongi udi mua kusungula dituku anyi dîba kampanda dia mu lumingu. Kualongelaye bimpe mmuaba udiye wenzela mudimu anyi? Nkumbelu anyi? Peshi mmuaba udi bantu ba bungi? Enza tshionso tshiudi mua kuenza bua kulonda programe wende.
4. Nuikale nulonga pa tshibidilu. Wewe ukeba kumbuka, kuimanyiki dilonga to. Kadi udiebeje ne:
-
Nenkokeshe mua kulonga nende dituku dikuabu lumingu alu anyi?
-
Nenkokeshe kulongela nende ku telefone anyi ku tshiamu tshia tuyukila bamonangane anyi?
-
Tshiena mua kulomba mumanyishi mukuabu bua kulonga nende anyi?
5. Sambila bua ulame meji mimpe. Lomba Yehowa bua ushale anu mudifile kudi mulongi webe, nansha yeye utata bua kulonga pa tshibidilu, anyi bua kutumikila mibelu ya mu Bible. (Filip. 2:13) Pamuapa mulongi webe udi ne ngikadilu mimpe ya bungi; sambila bua wikale utamba kumumuenena mu ngikadilu ayi.
