WAAPANKA EETTHUCI
MWAHA 10
Ulakela waakavihera atthu ukhala atthari
Ikano: “Coo, nithoonyeraka wuuwacerani, khanaalakenle wuuhimyerani ihapari comaana ca Nluku paahi, masi ciicammo naholakela uvaherera ukumiihu wotheene, kontha ninawuufentani venci.”—1 Atesal. 2:8.
Isiyani Yesu yaapankilyaawe?
1. Moone IVIDIYU awula nsome Joau 3:1, 2. Mwamalihaka, mwaakhule ala makohwaala:
-
Woonela winyu, nlattuni Nicodemos woonenlyaawe ukhala itthu yomaana urwaa umootola Yesu uhiyu?—Nwehe Joau 12:42, 43.
-
Yesu ahotthuna wootoliya ni Nicodemos uhiyu. Manannani iyo itthwiiyo inthoonyeraaya wiira Yesu aholakela waakavihera atthu ukhala attharyaawe?
Ntakihero na Yesu ninniitthuciha isiyani?
2. Nimpheela waathoonyera nifento atthu anaalalyeereehu naakaviheraka wiira akhale atthari a Yesu.
Muntakihe Yesu
3. Munsomihe ntthuuyo nipuro ni ukati nohalaawe uthanla. Atthunaka uyo naahala uthanla nihuku ni ukati umpheelaawe usoma. Nipuroni uyo nokhalaawe ootaphuwa wiira asome? Niireke untekoni wawe, uwannyawe awula nipuro nikhwaawe? Mpanke yotheene inhaleenyu ukhitiri wiira munsomihe ukati ni nipuro nimpheelaawe.
4. Nhihiyerere unsomiha. Hataa ukhala wiira nnopheela urwaa uttayi, nhihiye uvira isumana woohinsomiha. Muupuwele co:
-
Niireke wiira khamwaahala ukhitiri unsomiha nihuku nikhwaawe nhina yeeyo isumaneeyo?
-
Niireke wiira pooti wanonsomiheenyu mwanvarelaka nteko telefooni awula mwanlikarelaka niividiyuconferência?
-
Niireke khaavo namalalyeera nkhwaawe aahaleenyu unlepela wiira arwee ansomihe?
5. Nlompe wiira Yehova ookavihereni unwehera saana ntthuuyo. Munlepele Yehova wiira ookavihereni uhihiyerera unsomiha Ibiiblya ntthuuyo, hataa ukhalaka wiira khansoma mahuku menci awula naapica upanka marukunuso. (Afili. 2:13) Pooti ukhalaka wiira ntthu nonsomiheenyu Ibiiblya haana makhalelo omaana. Munlepele Yehova wiira ookavihereni woona makhalelo omaana uyo arinaawe.
