KÕM̦M̦AN RI-KAL̦OOR
KATAK 10
Tiljek
Naanin Kakapilõk: “Kõmar jek ilo bũruem ñan lewaj ñan kom̦, ejjab ennaan eo em̦m̦an jãn Anij wõt ak bareinwõt mour ko ammim kõnke el̦ap ami jitõnbõro ippem.”—1 Tes. 2:8.
Men eo Jesus Ear Kõm̦m̦ane
1. Alwõje PIJAIN ALWÕJ EO, ak riiti Jon 3:1, 2. Innem etale kajjitõk kein:
-
Etke Nikodimõs emaroñ kar kõn̦aan lol̦o̦k Jesus ilo boñ?—Lale Jon 12:42, 43.
-
Ilo an kar Jesus iioone Nikodimõs ilo boñõn eo, ewi wãween an men in kwal̦o̦k bwe Jesus ear tiljek ilo an kõm̦m̦an ri-kal̦oor?
Ta eo Jej Katak jãn Jesus?
2. Jej kwal̦o̦k ad yokwe armej ikijjeen ad niknik im tiljek ilo ad jipañ er ñan erom ri-kal̦oor.
Anõke Jesus
3. Katak ilo awa eo im jikin eo em̦m̦an ñan rũkkatak eo am̦. Emaroñ kõn̦aan katak ilo juon raan ak awa me em̦m̦an ñane. Enaaj ke em̦m̦an ippãn ñan katak ilo jikin jerbal eo an, m̦weo im̦õn, ak juon jikin ilo̦bwilej? El̦aññe ewõr am̦ maroñ, ukot jikejuul̦ eo am̦ bwe kwõn maroñ katak ippãn ilo awa eo im jikin eo me em̦m̦an ñan e.
4. Ekkeini am̦ katak Baibõl̦ ippãn armej eo. Ñe kwõnaaj jako jãn amiro katak, eokwe jab jol̦o̦k amiro katak. Ijello̦kun am̦ ãindein, l̦õmn̦ak kõn jet iaan men ko kwõmaroñ kõm̦m̦ani:
-
Kwõmaroñ ke karõk bar juon raan ilowaan wiik eo ñan katak ippãn?
-
Kwõmaroñ ke kajjitõk ippãn bar juon ri-kwal̦o̦k naan ñe emaroñ pinej jenkwam̦ im katak ippãn?
5. Jar im kajjitõk bwe kwõn bõk l̦õmn̦ak eo ejim̦we. Kajjitõk ippãn Jeova bwe en jipañ eok ñan tiljek wõt ilo am̦ katak ippãn rũkkatak eo am̦ meñe emaroñ pen an keini an katak ak ebõk iien ñan an jerbale naanin kakapilõk ko ilo Baibõl̦. (Pil. 2:13) Ejjel̦o̦k pere bwe elõñ kadkad ko rem̦m̦an ippãn rũkkatak eo am̦; jar im kajjitõk ippãn Jeova bwe en jipañ eok ñan l̦õmn̦ak wõt kõn kadkad kein an rem̦m̦an.
BAR LALE
JK. 3:27; Jrb. 20:35; 2 Kor. 12:15
