DISAIPIL NANI DAUKS
SAPTA 10
Dîa daukaia aisaram ba kat dauks
Baibil wina smalkanka ba: “Yang nani ridi kapri Gâd sturka yamni ba mai smalkaia bara rayaki nani pali sin yabaia. ¡Man nani ra uya latwan mai kaikri sa!” (1 Tes. 2:8).
Jisas dîa daukan ba
1. LILKA ba kaiks, apia kaka Jan 3:1, 2 aisi kaiki, naha makabi walanka nani laki kaiks:
-
¿Dîa muni Nikudimus ba tihmia ra Jisas ra plikan? (Jan 12:42, 43 kaiks).
-
¿Jisas nahki marikan disaipil daukaia warkka ba ai kupia aiska ni dauki kan ba?
¿Jisas dîa daukan ba wina yawan dîa lan takaia sip sa ki?
2. Upla nani ra latwan kaiki ba mita, disaipil kum takbia dukiara hilp munaia warkka ba, wan kupia aiska ni daukaia wilin sa.
Jisas daukan baku dauks
3. Ani awarka bara pliska stadi tatakrikam mapara pain ba ra stadika yas. ¿Stadi tatakrikam ba yua kum, apia kaka awarka kum pat wahbi saki mai win sa ki? ¿Anira stadika bribia kaka witin kau pain ai dara walbia: wark taki pliska ra, ai watla ra, apia kaka plis wala ra? Sip sma kaka, stadi tatakrikam awarka bara yua wahbi sakan ba dukiara, taimkam sakaia trai muns.
4. Piua bani stadika yabi bas. Man yua kum sip apia sma kaka, Baibil stadika yabras takaspara. Stadi tatakrikam ba Baibil stadika lus tiwbia apia dukiara, ¿tnatka wala nani pat luki kaikram sa ki?
5. Daukanka bara lukanka pain briaia dukiara puram suns. Stadi tatakrikam ra dîa daukaia wiram kat daukaia dukiara, Jehova ra ai hilpka makas. Naha ba tânka tara brisa. Kau pali stadi tatakrikam ba wik bani stadi takras sa kaka, apia kaka dîa lan taki ba ai rayaka ra alki daukaia karna munisa kaka (Pil. 2:13). Stadi tatakrikam ba daukanka painkira manis brisa kaia sa, baha mita baha ra sinskam mangkaia dukiara Jehova ra ai hilpka makas.
