SÕNG-Y-B TƖ B LEBG A ZEEZI KAREN-BIISI
SAK 10
Wilg-y tɩ y ratame n sõng-ba
Biibã sẽn yete: “Pa Wẽnnaam koe-noogã bal la d ra rat n taas yãmb ne d sũy fãa ye. D ra rat n kõo yãmb d mensã me, bala yãmb lebga tõnd nin-nongdse.”—1 Tes. 2:8.
A Zeezi sẽn maan to-to
1. Ges-y VIDEO wã, wall y karem Zã 3:1, 2. Rẽ poor bɩ y leok sogsgã:
-
Yãmb tagsdame tɩ yaa bõe yĩng la a Nikodɛm sẽn kẽng a Zeezi nengẽ ne yʋngã?—Ges-y Zã 12:42, 43.
-
A Zeezi sẽn sõs ne a Nikodɛm ne yʋngã, wãn to la rẽ wilgd t’a ra rat n sõng-a lame t’a wa lebg a karen-biiga?
A Zeezi sẽn maan to-to wã wilgda tõnd bõe?
2. D sã n sõngd nebã ne d sũy fãa sẽn na yɩl tɩ b wa lebg a Zeezi karen-biisi, wilgdame tɩ d nong-b lame.
Maan-y wa a Zeezi
3. Yãk-y wakat la zĩig sẽn zems ne a soabã n zãms-a Biiblã. Nina tõe n yãka daar bɩ lɛɛr takɩ semennã pʋgẽ, n dat tɩ y zãms-a Biiblã. Y sã n zãmsd-a Biiblã a tʋʋmã zĩigẽ, a zakẽ wã, wall zãma zĩigẽ n na n yɩ sõma ne-a bɩ? Maan-y y sẽn tõe fãa n paam sẽk n tõog n zãms-a Biiblã zĩig la wakat ning a sẽn date.
4. Ra vaand-y Biiblã zãmsgã ye. Y sã n wa pa na n tõog n tɩ zãms a soabã Biiblã, bɩ y ra bas tɩ zãmsgã vaal ye. Sok-y y meng yaa:
-
a. Rẽ yĩnga, m pa tõe n kẽng n tɩ zãms-a Biiblã wakat a to semennã pʋgẽ sɩda?
-
b. M pa tõe n zãms-a Biiblã ne telefõn wall ne videokõnferãns maasem sɩda?
5. Kos-y-yã a Zeova t’a sõng-y tɩ y tall yam-sõngo. Kos-y-yã a Zeova t’a sõng-y tɩ y kell n zãms a soabã Biiblã n da base, baa a sã n vaanda zãmsgã, wall a sã n maasa ne Biiblã saglsã tũubu. (Fili. 2:13) Sãmbg kae t’a soabã tara zʋg-sõma ye. Rẽ wã, pʋʋs-y-yã a Zeova t’a sõng-y tɩ y get a zʋg-sõma wã n yɩɩda.
