NÁ XA̱A̱NA NDASAKÁʼNUNA NDIÓXI̱
LECCIÓN 10
Kǒo sandákoún ña̱ kaʼviún xíʼinna
Ña̱ káʼa̱n tu̱ʼun Ndióxi̱: “Su̱ví kuití tu̱ʼun va̱ʼa xa̱ʼa̱ Ndióxi̱ níxikuni̱ndi̱ natúʼunndi̱ xíʼinndó, chi nda̱a̱ chi̱ka̱a̱-inindi̱ kuvindi̱ xa̱ʼa̱ndó chi ni̱xa̱a̱ndi̱ ni̱kuʼvi̱ní-inindi̱ xi̱nindi̱ ndóʼó” (1 Tes. 2:8).
Ña̱ ke̱ʼé ta̱ Jesús
1. Koto VIDEO á kaʼvi Juan 3:1, 2. Tándi̱ʼi, ndakanixi̱ní xa̱ʼa̱ pregunta ña̱ va̱xi yóʼo:
-
¿Ndáa xa̱ʼa̱ kúú ña̱ ni̱xa̱ʼa̱n ta̱ Nicodemo xi̱tora ta̱ Jesús tá ñuú? (Koto Juan 12:42, 43).
-
¿Ndáa ki̱ʼva ni̱na̱ʼa̱ ta̱ Jesús ña̱ ni̱ndi̱ʼi̱-inira natúʼunra xíʼin na̱ yiví xa̱ʼa̱ Ndióxi̱?
¿Ndáaña sákuaʼayó xíʼin ña̱ ke̱ʼé ta̱ Jesús?
2. Xa̱ʼa̱ ña̱ kúʼvi̱ní-iniyó xíniyó na̱ yiví, túviyó ña̱ miíyó kúú na̱ xíniñúʼu chindeétáʼan xíʼinna ña̱ xa̱a̱na ndasakáʼnuna Ndióxi̱.
Keʼé táki̱ʼva ke̱ʼé ta̱ Jesús
3. Kaʼvi xíʼinna hora xíʼin lugar ña̱ kúni̱ miína. ¿Á íyo iin ki̱vi̱ á hora ña̱ kúni̱na kaʼviún xíʼinna? ¿Ndáa míí kútóokana kaʼvina: á nu̱ú káchíñuna, á veʼena á nu̱ú xíka ku̱a̱ʼá na̱ yiví? Tá kivi, nasama sava ña̱ kéʼún ña̱ va̱ʼa ku̱ʼún kaʼviún xíʼinna hora xíʼin ki̱vi̱ ña̱ ni̱ka̱ʼa̱nna xíʼún.
4. Nda̱a̱ ni iin yichi̱ kǒo sandákoún ña̱ kaʼviún xíʼinna. Tá íyo nu̱ú ku̱ʼún, kǒo ka̱ʼún xíʼinna ña̱ va̱ása kaʼviún xíʼinna semana kán. Kivi keʼún sava ña̱ va̱xi yóʼo.
5. Ka̱ʼa̱n xíʼin Jehová ná chindeétáʼanra xíʼún ña̱ vií koo ña̱ keʼún. Ka̱ʼa̱n xíʼinra ná chindeétáʼanra xíʼún ña̱ kǒo sandákoún kaʼviún xíʼin na̱ yiví. Ta ndáyáʼviníka keʼún ña̱yóʼo tá na̱ yiví kán kǒo xíínna kaʼvi ni̱ʼina á ña̱ keʼéna ña̱ sákuaʼana (Filip. 2:13). Ka̱ʼa̱n xíʼin Jehová ña̱ chindeétáʼanra xíʼún ña̱ kotoún ña̱ va̱ʼa ña̱ kúúmií na̱ káʼviún xíʼin. Tasaá xa̱ún kunda̱a̱-iniún ña̱ ku̱a̱ʼání ña̱ va̱ʼa kúúmiína.
SAÁTU KOTO
Prov. 3:27; Hech. 20:35; 2 Cor. 12:15
