FAIA ISI MA SOO
LESONA 10
Maumauaʻi
Mataupu silisili: “Sa matou naunau ai e avatu iā te outou e lē na o le tala lelei a le Atua, ae faapea foʻi ma o matou lava ola, auā ua matou matuā alolofa iā te outou.”—1 Tesa. 2:8.
Mea na Faia e Iesu
1. Ia matamata le VITIŌ, pe faitau le Ioane 3:1, 2, ona manatunatu lea i fesili nei:
-
a. Aiseā atonu na filifili ai Nikotemo e asiasi atu iā Iesu i le pō?—Tagaʻi i le Ioane 12:42, 43.
-
e. Na faapefea ona faaalia e Iesu lona maumauaʻi e faia isi ma soo ina ua feiloaʻi ma Nikotemo i le pō?
O le ā e Tatou te Aʻoaʻoina Mai iā Iesu?
2. E iloa lo tatou alolofa i tagata pe a tatou maumauaʻi e fesoasoani iā i latou ina ia avea ma soo.
Faaaʻoaʻo iā Iesu
3. Suʻesuʻe ma le tagata aʻoga i le taimi ma le nofoaga e talafeagai ma ia. Atonu e fetaui ma ia se aso patino o le vaiaso, po o se taimi foʻi o le aso. Pe e manaʻo e fai lana suʻesuʻega i le fale faigaluega, lona fale, po o se nofoaga faitele? Pe a mafai, ia fetuunaʻi lau faasologa ina ia talafeagai ma manaʻoga o lau tagata suʻesuʻe.
4. Faia e lē aunoa le suʻesuʻega. Pe afai e te lē avanoa i le aso e fai ai le suʻesuʻega, aua neʻi tuua ai le suʻesuʻega. Nai lo o lea, ia iloilo fesili nei:
-
a. Pe e mafai ona fai le suʻesuʻega i se isi aso o le vaiaso?
-
e. Pe e mafai ona fai le suʻesuʻega e faaaogā ai le telefoni po o le Initaneti?
-
i. Pe e mafai ona e talosaga atu i se isi tagata talaʻi e na te faia le suʻesuʻega?
5. Tatalo ina ia maua pea le vaaiga saʻo. Ia talosaga iā Ieova ina ia e maumauaʻi e fesoasoani i lau tagata aʻoga, e tusa pe e faigatā mo ia le faia e lē aunoa o le suʻesuʻega pe faatatauina fautuaga a le Tusi Paia. (Fili. 2:13) E mautinoa e tele uiga lelei o lau tagata aʻoga. O lea, ia tatalo mo le fesoasoani ina ia e uaʻi atu i ona uiga lelei.
