AITULUOR ITUNGA IKESISIAK
AISISIAET NA 10
Ainakina
Aicoretait: Apotu “ketojokata akorakin yes mere akiro nukajokak nuka Edeke bon, konye akosiijar da, naarai iraas iminanakosi noi.”—1 Ses. 2:8.
Nuabu Yesu Kiswama
1. Kosesen EBIDIO, arai bo kosiom Yokana 3:1, 2. Kosodi abongokin aingiseta nuetupakinete:
-
Kanuinyo aticepak aseunia Nikodemo alosit neejai Yesu kuare?—Koany Yokana 12:42, 43.
-
Naeriamunotor Yesu keda Nikodemo kuare, epone ani abu ngesi kitodunia ebe akapakina ngesi aituluor itunga ikesisiak?
Anyoika bo Nuisisiauni Oni Kaneejai Yesu?
2. Itoduni oni ebe kimina itunga kopone loka ainakina aingarakin kesi araun ikesisiak.
Koputo Yesu
3. Kisisiata kotoma apak ka aiboisit naitojokit esisian. Epedori esisian aseun adiopaaran ka isawan kosabiiti. Eminakinit kereka nges aisisia kaneiswamai ngesi, kore, arai bo kanenice? Arai epedor, kijulak ainapetakon koupanara keda ejauteneke.
4. Kodunyakinitos aisisia. Sirikitwatania aisisia keda itunganan naarai imamei ijo. Koomoom ber ijo nuta:
-
Ipedori kereka ijo aisisia keda itunganan apaaran ace kosabiiti kangope kangol?
-
Ipedori kereka ijo aisisia keda nges kitwasamai esimu arai bo arucokin kanges kolago?
-
Ipedori kereka ijo alimokin idiopet koinacan kisisiata kanges?
5. Kilip Yawe kingarak ijo asesen esisianikon ejok. Kilip Yawe kingarak ijo asalakinit iinakina aingarakinit esisianikon, karaida etapit esisianikon atwanianar aisisia arai bo iyapi ngesi aibwaikin toma aswamisioit akiro nuesisiau. (Pil. 2:13) Epedori esisianikon kojaatar keda iponesio luipu luejok; kilip Yawe kingarak ijo apodokinit iponesioke luejok.
