TE FAIGA O SOKO
MATAUPU 10
Tuku Kātoa Atu
Fakatakitakiga: “Ne fia‵fia malosi matou o tuku atu ki a koutou, e se gata fua i te tala ‵lei a te Atua, kae e pelā foki mo omotou ola, me e fakapelepele ne matou a koutou.”—1 Tesa. 2:8.
Mea ne Fai ne Iesu
1. Onoono ki te VITIO, io me faitau te Ioane 3:1, 2. Kae mafaufau ki fesili konei mai lalo:
-
a. Kaia ne ‵lei atu ki a Nikotemo ke fanatu ki a Iesu i te po?—Onoono ki te Ioane 12:42, 43.
-
e. I te fetauiga mo Nikotemo i te po, ne fakaasi mai pefea ne Iesu me ne tuku kātoa atu a ia ki te faiga o soko?
Se a te Mea e Tauloto ne Tatou Mai i a Iesu?
2. E fakaasi atu ‵tou a‵lofa ki tino mai i te tuku kātoa atu o tatou o fesoasoani ki a latou ke fai pelā me ne soko.
Fakaakoako ki a Iesu
3. Fai te akoga i te taimi mo te koga e ‵lei ki tau tino akoga ki te Tusi Tapu. Kāti e isi se aso fakapitoa i loto i te vaiaso io me se taimi o te aso telā e ‵lei ki a ia. E mata e ‵lei atu ki a ia ke fai tena akoga i tena koga galue, i tena fale io me i koga e masani o olo ki ei a tino? Kafai e manakogina, e ‵tau o fai ne koe fakamafuliga ki au mea e fai ke mafai o fakafetaui mo te manakoga o te tino akoga.
4. Ke fai faeloa te akoga. Kafai e fano koe ki se isi koga, ke mo a ma taofi aka te faiga o te lua akoga. Ke mafaufau ki nisi feitu konei:
-
a. E mata, e mafai o fai te lua akoga i se isi taimi i te vaiaso tena?
-
e. E mata, e mafai o fai te lua akoga i luga i te telefoni io me i se polokalame sau‵tala i te itaneti?
-
i. E mata, e mafai o fakamolemole koe ki se tino talai ke fai ne ia te akoga?
5. Talo ke maua te kilokiloga tonu. Fakamolemole ki a Ieova ke maua te fesoasoani ke saga tonu atu koe ki tau tino akoga, māfai foki loa e faigata ki te tino akoga ke fai faeloa tena akoga io me fakagalue ne ia manatu fakatonutonu mai i te Tusi Tapu. (Fili. 2:13) E mautinoa me isi ne uiga ‵gali o tau tino akoga; talo ke fesoasoani mai ke saga tonu atu koe ki uiga konā.
