WAAPAKA AWIIXUTTI
YOOSOMA 10
Olakela Waakhaliherya Atthu Okhala Awiixutti
Yoolepa: “Okhala wira ninnoophentani vanceene, naahihakalala woolaleeryani ihapari sooreera sa Muluku, ohiya paahi opaka eyo, hiyo naahileva okumi ahu wira nookhaliheryeni”. — 1 aTes. 2:8.
Etthu Yesu Aapanke Awe
1. Nwehe EVIIDIYU, aahiiso mmusome Yohani 3:1, 2. Nuumala-vo, mwaakhule makoho anittharelana:
-
Etthu xeeni yaamwiirinhe Nikodemo ophavela okumana ni Yesu ohiyu? — Munwehe Yohani 12:42, 43.
-
Moota xeeni Yesu oonihenrye awe wiira aahilakela waapaka awiixutti, mwaha wa weemererya okumana ni Nikodemo ohiyu?
Etthu Yesu Onniixuttiha Awe
2. Mwaha wa waaphenta atthu, hiyo noolakela waakhaliherya atthu awo okhala awiixutti.
Mmutakiheke Yesu
3. Mmusomiheke naxikola anyu Biibiliya, opuro ni okathi onithanla awe. Owo pooti othanlaka nihiku aahiiso ewoora onoona awe oreerela vasumanani. Woonasa wene, pooti woonaka oreerela osoma nipuro onivara awe muteko, owannyawe, aahiiso nipuro ninvira atthu. Vaweryaneya vale, mulokiherye eprokaraama anyu wiira musomeke nuuwo opuro ni okathi onoona awe oreerela.
4. Muhicompeleke omusomiha. Mwaweha wiira khamunrowa okhala, muhinteerye yoosoma eyo. Ohiya-vo, muupuwele itthu iya:
-
Niireke mwanwerya omusomiha nihiku nikina, masi esumana yeeyo?
-
Niireke mwanwerya omusomiha mmurumeelaka telefoni aahiiso murumeelaka eviidiyu konferensiya?
-
Niireke mwanwerya onvekela namalaleerya mukina wiira amusomihe?
5. Munvekeleke Muluku wiira mukhalane moonelo wooloka. Munvekeleke Yehova wiira ookhaliheryeni ohihiya omwiixuttiha mutthu owo, hata ohiweryaka osoma ikwaha sootheene nvarihanne anyu, aahiiso opisaka weettela itthu oniixutta awe. (aFil. 2:13) Woonasa wene, naxikola anyu ookhalana mikhalelo sinceene sooreera. Nto munvekeleke Muluku wiira ookhaliheryeni owehexexa seiyo.
